Santiago 2 - Quiché Bible

Miya' na u k'ij jun winak chuwäch jun chic

¹ Wachalal, pa ri i cojonic che ri juluwemalaj Kajaw Jesucrist, jalan mebiwil wi tak ri winak, xane' junam chebiwila wi conojel.

² We coc bic pa ri i mulin ib jun achi ri e u cojom tak mulk'ab re k'an puak xukuje' je'lalaj ratz'iak, we xukuje' coc bic jun meba' ri u cojom k'e'l ratz'iak,

³ we c'u nim quiwil wi ri u cojom je'lalaj ratz'iak quibij c'u che: “Chatt'uyul waral ri utz wi”, quibij c'u che ri meba': “Chattac'al chila', o chatt'uyul waral puwi' ri qui tac'alibal ri wakan”,

⁴ ¿la ma ta quiya' na u k'ij jun winak chuwäch jun chic? ¿La ma ta quik'at tzij paquiwi' ri winak ruc' itzel tak i chomanic?

⁵ Lok'alaj tak wachalal, chitatabej ri nu tzij: Ri Dios e u cha'om ri mebayib re we uwächulew ri', chi e are' ri k'inomab che cojonic, cäquechbej na ri ajawibal ri u bim ri Dios chi cuya' na chque ri winak ri cäquilok'ok'ej ri are'.

⁶ Ri ix c'ut man nim ta quiwil wi ri meba'. ¿La ma ta e are ri k'inomab ri e c'analaj tak winak ri e c'o piwi', ri quixquicharchatej bic pa ri k'atbal tzij?

⁷ ¿La ma ta e are' ri cäquetz'bej u wäch ri utzalaj u bi' ri Crist ri cänatax piwi'?

⁸ Utz quibano we kastzij quibano jas ri cubij ri pixab ri nim u banic, jas ri cubij ri Tz'ibatalic: “Chalok'ok'ej ri awajil a tz'akat jas ri u lok'ok'exic awib chbil awib”. Utzqui bano.

⁹ We c'u sibalaj quiya' na u k'ij jun winak chuwäch jun chic, quixmacunic. Ri pixab cuk'alajisaj chi man quinimaj taj.

¹⁰ Apachin ta' ne ri cunimaj ronojel ri pixab, cämacun c'u ne chrij xa' jun u tz'akatil, c'o u mac chquij conojel ri pixab.

¹¹ Rumal rech chi are ri xbinic: “Matkaj pa mac cuc' niq'uiaj chic”, xubij xukuje': “Matcämisanic.” We man at kajinak pa mac cuc' niq'uiaj chic, we c'u ne at cämisaninak, man a nimam ta ri' ri pixab.

¹² Je chixtzijonok, je chibana', je jas ri cäk'at na tzij piwi' rumal ri pixab ri cujutoro.

¹³ Ri jun ri man elinak ta u c'u'x chque niq'uiaj chic, ri Dios man quel ta u c'u'x che ri are' aretak cuk'at na tzij puwi'. Nim na ri elebal c'u'x chuwäch ri k'atoj tzij.

Ri cojonic xukuje' ri u banic utzalaj tak chac

¹⁴ Wachalal, ¿jas lo ri quechbexic we c'o jun cubij chi c'o u cojonic, man c'o ta c'u ne utzalaj tak chac cubano? ¿La cäcuin lo we cojonic ri' che u colic?

¹⁵ We ri awachalal achi o ixok cat'unuwic o cuna' wi'jal,

¹⁶ c'o ta c'u jun chiwe cubij che: “Jät pa utzil, chamik'a' awib, chatnojok”, ma ta c'u quiya' che ri rajawaxic che ri u cuerp, ¿jas ta lo ri carechbej chiwe?

¹⁷ Je c'u wa' xukuje' ri i cojonic, we man e c'o chac quibano, ri cojonic ri xak u tuquiel cäminak.

¹⁸ C'o c'u jun cubij na: “At c'o a cojonic, ri in c'ut c'o chac quinbano.” Chac'utu' chnuwäch ri a cojonic ri man e rachilam ta chac. Ri in c'ut quinc'ut chawäch ri nu cojonic rumal ri chac ri quinbano.

¹⁹ At cacojo chi xa' jun ri Dios. ¡Utz cabano! Xukuje' ri itzel tak uxlabal quecojonic, xukuje' quebirbit rumal xe'n ib.

²⁰ Matux con. Chach'obo' chi we ri cojonic ri c'o ruc' jun winak man e rachilam ta chac, jun cojonic wa' ri man cuyao taj.

²¹ Ri Abraham ri ka mam, ¿la ma ta xk'alajisaxic chi suc' rumal ri u chac, aretak xuya' ri Isaac ri u c'ojol puwi' ri porobal?

²² Cawilo chi xchacun ri u cojonic ruc' ri u chac, chi ri u chac xutz'akatisaj ri u cojonic.

²³ Je xbantajic jas ri cubij ri Tz'ibatalic, ri cubij: “Ri Abraham xcojon che ri Dios, rumal wa' xuc'ämawaj ri Dios jacha' jun suc'.” Xbix che ri Abraham chi are rachil ri Dios.

²⁴ Quinwil c'ut chi ri winak cäk'alajisaxic rumal ri u chac chi suc' chic, man xuwi ta rumal ri cojonic.

²⁵ Jewa' xuban ri ixok Rahab ri ixok quech nim ch'utin, xk'alajisaxic chi suc' rumal ri xubano, aretak xebuc'ulaj ri tako'nib, xeresaj c'u bic pa jun be chic.

²⁶ Jas ri cuerp ri man rachil ta uxlabal, are cäminak, jeri' xukuje' cäminak ri cojonic ri man e rachilam ta chac.