Salmib 99 - Quiché Bible

Ri Ajawaxel are' Ajawinel ri nim u banic

¹ ¡Ri Ajawaxel are' ajawinel! ¡U yo'm ri u tem re ajawibal paquiwi' ri aj cajalaj tak to'banelab ri e c'o qui xic'! Queyicop na ri nimak tak tinimit xukuje' ronojel ri uwächulew.

² Ri Ajawaxel nim u k'ij puwi' ri juyub Sion; ri Ajawaxel c'o paquiwi' conojel tak ri tinimit.

³ Chyo'k u k'ij ri u bi', nim xukuje' xibibal; ¡Ri Dios tastalic!

⁴ Ri lal lal jun ajawinel ri c'o u cuinem; ri culok'ok'ej ri suq'uilal; cäkaj ri suq'uil chwäch la; kas lal xjekeban la ri junamil. Banom la suq'uil xukuje' colomal chque ri e ralc'ual ri Jacob.

⁵ ¡Chiya' u k'ij ri Ajawaxel ri ka Dios, chixxucul xe' rakan u k'ab! ¡Ri Dios tastalic!

⁶ Ri Moises xukuje' ri Aaron e c'o chquixo'l ri e cojol tak tabal tok'ob; ri Samuel c'o chquixo'l ri cäquiya' u k'ij ri u bi'. Ri Ajawaxel cutzelej u wäch qui tzij aretak caquitz'onoj ri u to'banic.

⁷ Ri Dios xtzijon cuc' chupam ri jutac'aj sutz', ri e are' xquibano jas ri xetak wi rumal xukuje' xquinimaj ri pixab ri xuya' chque.

⁸ Ajawaxel, ka Dios, ¡lal xtzelej la u wäch qui tzij! Xux la jun Dios chque ri cucuy macaj, xc'äjisaj c'u la u wäch ri quetzelal.

⁹ Chiya' u k'ij ri Ajawaxel, ri ka Dios, ¡chixxucul chuwäch ri tastalicalaj u juyub! Ri ka Dios, ri Ajawaxel, tastalic ri are'.