Salmib 98 - Quiché Bible

¡Ri Ajawaxel u rikom ri ch'äcanem!

¹ ¡Chibixoj che ri Ajawaxel jun c'ac' bix, u banom c'u tak mayibal! ¡U rikom c'u ch'äcanem rumal ri nimalaj u cuinem, xukuje' rumal ri tastalicalaj u k'ab!

² Ri Ajawaxel resam u tzijol ri u ch'äcanic; u c'utum ri u suq'uil chquiwäch ri nimak tak tinimit;

³ man resam ta ri lok'ok'ebal u c'u'x xukuje' ri u jicomal puwi' ri u tinimit Israel. ¡C'ä pa ri q'uisbal u jutz' ri uwächulew ilitajinak wi ri u ch'äcanic ri ka Dios!

⁴ Chixbixon che ri Dios ruc' quicotemal, ri ix jekel chuwäch ronojel ri uwächulew; chi tzokopij ri i quicotemal chebibixoj tak bix che.

⁵ Chebibixoj bix che ri Ajawaxel ruc' rok'ibal arp, cuc' cok'ibal k'ojom ri c'o qui c'amal:

⁶ Chixbixon ruc' quicotemal chuwäch ri Ajawaxel, ri Ajawinel, ruc' rok'ibal k'ojom re quiakik'.

⁷ Chjinin ri plo xukuje' ronojel ri c'o chupam, ri uwächulew xukuje' conojel ri e c'o chuwäch;

⁸ chepak'pat ri nima'; chquijunaj tak quib ri juyub pa rakoj tak chi'aj re quicotemal.

⁹ Chuwäch ri Ajawaxel, ri cäpe che u k'atic tzij puwi' ri uwächulew. Cätakan na paquiwi' tak ri tinimit cho ri uwächulew ruc' colomal xukuje' junamil.