Salmib 97 - Quiché Bible

¡Ri Ajawaxel Ajawinel!

¹ ¡Chquicot ronojel ri uwächulew! ¡Chequicot ri ch'akatak tak ulew ri man e ajilatal taj ri e c'o chupam ri plo! ¡Ri Ajawaxel are' Ajawinel!

² Sutim rij rumal jun tzatzalaj sutz'; ri suq'uil xukuje' ri takal u banic are' e tok'eninak ri u tem re ajawibal;

³ ri k'ak' nabe chuwäch quebuporoj c'u ri c'ulel ri quenakajin che.

⁴ Ri e u caypa' caquisakarisaj ri uwächulew; ¡ri ulew cäyicopic aretak cärilo!

⁵ Ri c'ache'laj quejaric jacha' ri xca'b chuwäch ri Ajawaxel, ri ajchak'e ronojel ri uwächulew.

⁶ Ri caj cäresaj u tzijol ri u suq'uil; conojel tak ri tinimit cäquil ri u juluwem.

⁷ Quemach'irisax canok ri quequik'ijilaj tak diosib, ri caquina' quib chi nimak qui banic cumal. ¡Conojel ri diosib caquipachba' quib chuwäch!

⁸ Oh Ajawaxel, ri Sion xukuje' conojel tak ri tinimit aj Juda, sibalaj quequicot che ri pixab la ri e tz'ibam la;

⁹ ri lal c'ut, Ajawaxel ri lal c'o chicaj, lal c'o puwi' ronojel ri uwächulew, nim na banic la chquiwäch ri diosib.

¹⁰ Ix ri quilok'ok'ej ri Ajawaxel, chiwetzelaj u wäch ri lawaloyil; cuch'uk ri qui c'aslemal ri e jic chuwäch; queresaj pa qui k'ab ri banal tak etzelal.

¹¹ Ri chäj cäjuluw che ri utzalaj winak; ri quicotemal are cätaki' che ri tz'akatisanel pa ronojel.

¹² ¡Chixquicot ruc' ri Ajawaxel, utzalaj tak winak, chiya' c'u u k'ij ri tastalic u bi'!