Salmib 96 - Quiché Bible

Jun c'ac' bix che ri Ajawaxel

¹ Chibixoj jun c'ac' bix che ri Ajawaxel; chixbixon che ri Ajawaxel, iwonojel ri ix c'o cho ri uwächulew;

² chixbixon che ri Ajawaxel, chiya' u k'ij ri u bi'; k'ij chi k'ij chiya' u tzijol ri u colonic.

³ Chitzijoj ri u juluwem xukuje' tak ri e u mayibal pa ri alaj tak tinimit xukuje' pa ri nimak tak tinimit,

⁴ rumal rech chi ri Ajawaxel nim xukuje' sibalaj takal che chi cak'ijilaxic: ¡caxex ib chuwäch chquiwäch conojel ri diosib!

⁵ Ri e qui diosib ri jule' tak tinimit chic man c'o ta jas ri quecuin ta che u banic, are' c'u ri Ajawaxel, are' xebanow ri caj.

⁶ ¡C'o nimalaj juluwem chuwäch! ¡C'o cuinem xukuje' je'lal chupam ri cak'ijilax wi!

⁷ Chiya' che ri Ajawaxel, ri ix cachalaxic tak ri tinimit, ri cuinem xukuje' ri juluwem;

⁸ chiya' ri nim ilic che ri Ajawaxel ri ya'tal che; chixoc chuwäch ri rachoch cuc' tak sipanic,

⁹ chik'ijilaj ri Ajawaxel pa ri je'lalaj c'olbal ri cak'ijilax wi. ¡Conojel ri winak cho ri uwächulew quina' quib chuwäch!

¹⁰ Chibij chque ri nimak tak tinimit: “¡Ri Ajawaxel are ajawinel!” Are' xjekeban ri uwächulew rech man cäslab taj; junam cuban che u k'atic tzij paquiwi' tak ri tinimit.

¹¹ ¡Chquicot ri caj xukuje' ri uwächulew! ¡Chjinin ri plo xukuje' conojel ri c'o chupam!

¹² ¡Chquicot ri juyub xukuje' ronojel ri c'o chupam! ¡Quiraka' qui chi' ri juwi' tak che' ri e c'o pa ri c'ache'laj ruc' quicotemal!

¹³ ¡Chuwäch ri Ajawaxel, ri cäpetic! ¡Je', cäpe che u k'atic tzij puwi' ri uwächulew! ¡Cätakan na paquiwi' tak ri tinimit cho ri uwächulew ruc' suq'uil xukuje' ruc' kastzij!