Salmib 95 - Quiché Bible

Chujbixon che ri Ajawaxel ruc' quicotemal

¹ Chixpetok, ka bixoj ri Ajawaxel ruc' quicotemal; chujbixon che ri ch'ukul kech xukuje' ka Colonel.

² Chujoc chuwäch ruc' maltioxinic, chekabixoj bix che u ya'ic u k'ij.

³ Rumal rech chi ri Ajawaxel are' nimalaj Dios, ri nimalaj Ajawinel ri c'o paquiwi' conojel ri diosib.

⁴ Ri are' e c'o ri e u najil ri u pam ri ulew pa u k'ab; e rech ri juyub ri sibalaj naj e elinak chicaj.

⁵ Ri plo rech are', are' c'u xbanowic; ¡cuc' ri kas e u k'ab xunuc' ri chaki'j ulew!

⁶ Chixpetok, xucuxuj chujk'ijilanok; kaxucu' kib chuwäch ri Ajawaxel, are' c'ut ri are' xujbanowic.

⁷ Are' ka Dios, ri uj uj u tinimit; uj chij rech ri u yuk'bal. Chitampe' camic ri cubij are' chiwe:

⁸ “Micowirisaj ri iwanima', jas ri xc'ulmataj pa Merib; jacha' ri k'ijol pa Masa, pa ri chaki'j uwo sak,

⁹ aretak xinquic'ambejej ri e i mam, pune' xquil tak ri chac ri xebenbano.

¹⁰ Cawinak (40) junab xinoyowar cuc' we winak ri', xinbij c'ut: ‘We winak ri' sibalaj quinajtajisam quib chwij ¡man quequinimaj ta ri e nu takomal!’

¹¹ Rumal ri' xinban ri chi'nic ri kas cäban na pa ri woyowal chi man queboc ta na pa ri nu c'olbal ri quinuxlan wi.”