Salmib 94 - Quiché Bible

Ri Ajawaxel are' K'atal Tzij re ri niq'uiajsak

¹ ¡C'utu' ib la, Ajawaxel, Dios ri quebuya' rajil c'axelal!

² Lal ri lal u k'atal tzij ri niq'uiajsak; ¡walij la chquij ri caquinimarisaj quib ya' c'u la ri takal chque!

³ ¿C'ä jampa', Ajawaxel, c'ä jampa' cäq'uis ri qui quicotemal ri banal tak etzelal?

⁴ Conojel we e banal tak etzelal ri' man c'o ta caquitojbej rech ri qui c'as, xukuje' e banal tak nimal.

⁵ Oh Ajawaxel, cäquiban c'ax che ri tinimit la; quequimach'irisaj ri e ech la.

⁶ Quequicämisaj malca'nib xukuje' ri man e qui winakil taj; xukuje' quequicämisaj ri e minorib.

⁷ Cäquibij chi ri Ajawaxel man cäril taj, chi ri u Dios ri Jacob man cunabej taj.

⁸ ¡Chixch'obonok tac tak winak, xukuje' man c'o ta i no'j! ¿Jampa' lo quixcuinic qui ch'obo?

⁹ ¿La xa ta c'u lo ma ta catanic ri e banowinak ri xquinaj? ¿La xa ta c'u lo ma ta cäril ri xebanow ri bak'wächaj?

¹⁰ ¿La xa ta c'u lo ma ta cac'äjisan wächaj ri quepixben ri nimak tak tinimit? ¿La xa ta c'u lo ma ta reta'm ri cätijon ri etamanic che ri winak?

¹¹ Ri Ajawaxel reta'm chi ri winak xuwi cuchomaj conil.

¹² Oh Ajawaxel, utz rech ri winak ri capixbej la, xukuje' queya' la ri tijonic la che

¹³ rech man c'o ta cubij u c'u'x aretak quebopan ri c'axalaj tak k'ijol, are c'u ri banal etzelal cac'ot ri u julil.

¹⁴ Ri Ajawaxel man cuwonoba' ta can ri u tinimit, mawi quebuya' ta can ri e rech qui tuquiel.

¹⁵ Ri suq'uil cux chi na suq'uilal, ronojel c'u winak ri tz'akatisanel pa ronojel cutakej na.

¹⁶ ¿Jachin ta ri cäwalij che nu to'ic pa qui k'ab ri e banal tak etzelal xukuje' ri itzel tak winak?

¹⁷ We ta ma ta xinuto' ri Ajawaxel, in c'o ta chi ri' pa ri mukubal.

¹⁸ Aretak c'o jumul xinbij: “Ri wakan quejiljobic”, ri lok'ok'ebal c'u'x la, Ajawaxel, xpe che nu to'ic.

¹⁹ Aretak q'ui tak chomanic cäquiya' quib pa nu jolom, ri lal cacu'bisaj la nu c'u'x xukuje' cäya' la nu quicotemal.

²⁰ Ri lal man cuya' ta cachilaj ib la cuc' ri e jech'alaj tak k'atal tak tzij, ri man utz ta u cojic ri pixab caquibano;

²¹ cäquitzucuj u cämisaxic ri man c'o ta u mac, tz'akat c'u ne pa ronojel, cäquicokoj che cämical.

²² Are c'u ri Ajawaxel are' nu panibal; ri nu Dios, are' nimalaj abaj ri quinto'wic.

²³ Ri Ajawaxel cuban na chi ri e banal tak etzelal cäsach na qui wäch rumal ri quetzelal. ¡Ri ka Dios are' cäsachow na qui wäch!