Salmib 93 - Quiché Bible

Ri Ajawaxel are' Ajawinel

¹ ¡Ri Ajawaxel ajawinel! ¡Ri Ajawaxel xratz'iakij rib ruc' juluwem, xukuje' u sutim rij ruc' cuinem! Are' xjekeban ri uwächulew rech man cäslab taj.

² Ri tem la re ajawibal co jekelic ojer petinak ulok, Ajawaxel. ¡Ri lal, ojer ulok lal c'olic!

³ Oh Ajawaxel, ri nima' quejininic, quequiwalijisaj nimak tak rekbala';

⁴ are c'u ri lal, Ajawaxel, pa ri chicaj, c'o na ri cuinem la chuwäch ri rekbala', xukuje' chuwäch ri u jininem ri plo.

⁵ Oh Ajawaxel, ri e takomal la co e jekelic. ¡Ri tastaliquil are wikbal junalic chupam ri achoch la!