Salmib 92 - Quiché Bible

Jun bix re k'ijilanic

¹ Ajawaxel, ri c'o la pa ri caj, ¡sibalaj utz u ya'ic maltioxinic che la xukuje' quibixoxic tak bix che u ya'ic k'ij la!

² U ya'ic u tzijoxic ak'abil xukuje' chak'ab ri nimalaj lok'ok'ebal c'u'x la xukuje' ri jicomal la,

³ cuc' cok'ibal k'ojom ri c'o qui c'amal, ruc' chuch'ujil rok'ibal arp xukuje' nimalaj arp.

⁴ Oh Ajawaxel, yo'm la nu quicotemal cumal tak ri jastak ri e banom la. Ri e chac la quinquinojisaj che quicotemal.

⁵ Oh Ajawaxel, sibalaj e nimak jastak ri e banom la, sibalaj man cäch'obtaj ta ri chomanic la.

⁶ ¡Xuwi ri man etal ta tzij man quecuin ta che u ch'obic!

⁷ We ri e banal tak etzelal xukuje' ri e itzel tak winak queq'uiyic e jacha' ri k'ayes, utz c'u quebelic, xa che u sachisaxic qui wäch chbe k'ij sak.

⁸ Ri lal c'ut Ajawaxel, lal c'o chicaj amak'el.

⁹ Jun jasach ri kastzij, Ajawaxel: ri e c'ulel la cäsach na qui wäch; conojel ri itzel tak winak quejabux na.

¹⁰ Lal cäya' la u wi' ri nu chuk'ab, jacha' ri e u chuk'ab jun ama' wacax, cak'ij c'u la c'oc'alaj cunabal pa nu jolom.

¹¹ Quinwil c'u na ri quitzakic ri e nu c'ulel; ¡quinta' na ri qui ch'ikowem we banal tak etzelal ri'!

¹² Ri e utzalaj tak winak quecotz'ijan na e jacha' ri tut, queq'uiy na jacha' ri chacalte' pa ri Libano.

¹³ E tiquitoj chupam ri rachoch ri Ajawaxel; quecotz'ijan cho ri uwo ja rech ri rachoch ri ka Dios.

¹⁴ Pune' c'u e ri'jobinak chic, caquiya' na qui wäch; amak'el quetojtatic xukuje' e räx.

¹⁵ Cäquesaj c'u na u tzijol chi ri Ajawaxel, ri to'l wech, are' suc' man c'o ta ri ma ta suq'uil ruc'.