Salmib 91 - Quiché Bible

Ri Ajawaxel are ka panibal

¹ Ri cajeki' chuxe' ri to'banelalaj u mu'jal ri c'o chicaj, ri c'o ronojel u cuinem,

² cubij che ri Ajawaxel: “Lal ri' ri nu panibal, ri to'bal wib, ¡nu Dios ri nu jiquibam wi nu c'u'x!”

³ Xuwi ri are' cäcuinic catuto' chquiwäch tak ri c'ämibal ri e c'u'talic xukuje' tak yabil ri quecämisanic,

⁴ catuch'uk c'u na cuc' ri e u xic', man c'o ta c'u jas cac'ulmaj na chquixe'. ¡Ri u jiquil catucol c'u na jacha' jun quetequic ch'ich'!

⁵ Maxe'j awib chquiwäch ri banal tak c'ax chak'ab, mawi chque ri ch'ab ri queq'uiak pa k'ij,

⁶ mawi chquiwäch ri cämisanel tak yabil ri quebopan pa k'ekumalil, mawi ri quecämisan pa tiq'uil k'ij;

⁷ jun mil quecäm na pa ri a mox, lajuj mil quecäm pa ri awiquik'ab, are c'u ri at man c'o ta jas cac'ulmaj na.

⁸ Xuwi c'u cawil na: quebawil na ri banal tak etzelal cäquic'am ri tojbal re ri quetzelal jas ri takal chque.

⁹ A banom c'u ya' che ri Ajawaxel chi are' a panibal, che ri Dios aj chicaj ri a c'olbal ri cach'uk wi awib,

¹⁰ man cäpe ta c'u na jun lawaloyil pawi' mawi ri yabilal copan ta pa ri awachoch.

¹¹ Cuya' c'u na takanic chque ri e u tako'n aj caj che a chajixic apawije' ta ne ri catbe wi.

¹² Catquitelej na bic pa qui k'ab rech man cachak'ij ta awib puwi' jun abaj.

¹³ Catcuinic catbin chquixo'l tak coj, chquixo'l jilijak tak awaj xukuje' tak cumätz'.

¹⁴ “Ri in quinto' na, quinwesaj na pa qui k'ab conojel, rumal rech chi ri are' quinulok'ok'ej cuch'ob c'u nu wäch.

¹⁵ Aretak quinusiq'uij, quintzelej na u wäch ri u tzij; ¡in quinc'oji' na ruc'! Quinwesaj na chupam ri c'ax quinya' na u k'ij;

¹⁶ quinbano chi naj cäc'asi na: ¡quinya' na che chi cäquicot pa ri nu colobenic!”