Salmib 90 - Quiché Bible

Ri u junaliquil ri Dios xukuje' ri u tukaril ri winak

¹ Ajawaxel, lal uxinak ulok ka panibal uj ch'ukum la petinak ulok pa conojel tak ri k'ij junab.

² C'ä majok cheq'uiy tak ri juyub, c'ä majok chc'oji' ri ulew xukuje' ri niq'uiajsak, pa tak ri k'ijol ojer petinak ulok c'ä pa ri q'uisbal tak k'ijol, lal lal Dios.

³ Cäban la chi ri winak cätzelej pa ri puc'uc' ulew aretak cäbij la: “Chetzelej ri winak pa ri puc'uc' ulew.”

⁴ Kastzij, ri jun mil (1000) junab che la, are e je jacha' ri k'ij re iwir ri xoc'owic; e je jacha' quieb oxib jok'otaj re ri chak'ab.

⁵ Quebe juruj la bic ri winak ruc' tokinic, e je ta ne ri xa ta e jun ichic';

⁶ e je jacha' ri k'ayes ri cäpok'ic, cäcotz'ijanic pa ri benak k'ij c'ut cabuch'uyiric, cäcäm c'ut.

⁷ Kastzij, ri u k'ak'al ri oyowal la cusach ka wäch, ¡man cäkarik ta chic jas cäkabano!

⁸ Ri ka mac xukuje' ri ketzelal e liq'uin chwäch la.

⁹ Kastzij, ri ka c'aslemal cäsach u wäch rumal ri oyowal la; ri ka junab are je jacha' jun uxlabic ri coc'owic.

¹⁰ E oxc'al lajuj (70) ri junab ri cujc'asi'c, ri c'o na qui chuk'ab, quec'asi' jumuch' junab; are c'u ri banoj nimal chi naj cac'asi' jun xuwi quebuc'am ulok yabal tak latz' xukuje' rikoj c'ax. Ri junab aninak queboc'owic, xukuje' c'u ri uj.

¹¹ ¿Jachin ta ri retamam ri u tokinic ri oyowal la? ¿Jachin ta ri retamam ri c'anal la?

¹² C'utu' la chkawäch ri tz'akatalaj cajilaxic tak ri ka k'ij, rech ri ka chomabal curik no'j.

¹³ ¡Ajawaxel, tzelej la kuc'! ¿Joropa' k'ij cäbeytaj chi na la? Chel c'u'x la chque tak we pataninelab la ri'.

¹⁴ Chujnojisaj la che ri lok'ok'ebal c'u'x la aretak cachapletaj ri k'ij, cujbixon c'u na ruc' quicotemal pa ronojel ri ka c'aslemal.

¹⁵ Chya' la q'ui junab re quicotemal chke jacha' ri qui q'uial ri junab re c'axc'olil ri e ka rikom.

¹⁶ ¡Chbana' la chi ri e pataninel tak ech la xukuje' ri e quija'lil quecuinic cäquil ri chac la xukuje' ri juluwem la!

¹⁷ Chi ri rutzil ri Ajawaxel, ri ka Dios, cäc'oji' na pakawi'. ¡Co jekeba' la Ajawaxel ri ka chac! ¡Kas co jekeba' la, ri ka chac!