Salmib 89 - Quiché Bible

Ri u c'ulwächinic ri Dios ruc' ri David

¹ Amak'el quinbij chupam ri nu bix, Ajawaxel, chi sibalaj lal banal utzil; man quintanaba' ta u tzijoxic chi ri lal lal jic.

² Quinwesaj na u tzijol ri lok'ok'ebal c'u'x la chi junalic; chi ri jiquil la man q'uextajel taj, man q'uextajel ta jacha' ri caj.

³ Xban la jun c'ulwächinic ruc' ri David; xchi'j la che ri lok'om pataninel la, ri cha'om la:

⁴ “Quinban na chi ri e awija'lil quebajawin na amak'el chupam ri a c'olbal.”

⁵ Oh Ajawaxel, conojel ri e c'o pa ri caj cäquiya' u k'ij ri jiquil la xukuje' tak ri e mayibal la.

⁶ ¡Man c'o ta jun chic dios, mawi jun pa ri caj ri cäjunamataj ta uc' la, Ajawaxel!

⁷ Nimalaj Dios xukuje' xibibal, sutim rij cumal ri e c'o pa ri caj.

⁸ Ajawaxel, Dios ri c'o ronojel u cuinem, ronojel ri cuinem ech la are c'u ri kastzij sutim ij la rumal; ¡man c'o ta jachin jun cäjunamataj ta uc' la!

⁹ Lal c'o takanic la puwi' ri plo ri c'anarinak, cajamarisaj la ri u wäch ri quewalijic;

¹⁰ xtac'alej la ri jilijic awaj re ri plo je ta ne jun cäminak; xejabuj la ri e c'ulel la ruc' ri u chuk'ab ri k'ab la.

¹¹ Ri caj xukuje' ri ulew e ech la; lal xbanow la ri uwächulew xukuje' ronojel ri c'o chuwäch.

¹² Lal xq'uiyisam la ri iquiak'ab xukuje' ri mox k'ab; ri e juyub Tabor xukuje' ri Hermon cäquibixoj ri bi' la ruc' quicotemal.

¹³ Ri k'ab la cuinel; ri iquiak'ab la c'o u chuk'ab xukuje' ch'äcanel.

¹⁴ Ri tem re ajawibal la jekel puwi' ri suq'uil xukuje' ri ya'tal u banic; ri lok'ok'ebal c'uxaj xukuje' ri kastzij quebel ulok che c'ulaxic la.

¹⁵ Oh Ajawaxel, utz rech ri tinimit ri reta'm cuya' k'ij la ruc' quicotemal, ri cäbinic tunam rumal ri chaj la,

¹⁶ ri cäquicot ronojel k'ijol pa ri bi' la, cäbe c'u ranima' che ri suq'uil la.

¹⁷ Kastzij, lal ri lal u chuk'ab xukuje' ri u je'lical; ri ka chuk'ab cänimar rumal ri utzalaj rayibal la.

¹⁸ ¡Ri ch'ukubal kib are' ri Ajawaxel! ¡Ri kajawinel are' ri Suc' re Israel!

¹⁹ Pa jun k'ijol ojer xch'aw la ulok pa jun c'utwächinic, xbij la chque ri jicalaj tak pataninel tak ech la: “Nu cha'om jun aj nu tinimit ri c'o u chuk'ab, nu nimarisam u k'ij nu to'm c'ut.”

²⁰ “¡Nu rikom ri pataninel wech ri David! Ruc' ri waseit nu c'utunisam chi are' ajawinel,

²¹ mawi c'u jubik' ma ta chinto', quinya' na u chuk'ab ruc' ri nu cuinem.

²² Man quech'ojin ta c'u na ri e u c'ulel ruc' mawi cach'äc na cumal ri e banal etzelal.

²³ Quebenxak'alej na ri e u c'ulel; ¡quebenwesaj na chuwäch! ¡Quinban na ch'akatak chque ri quetzelam u wäch!

²⁴ Cac'oji' na ri nu lok'ok'ebal c'u'x ruc' xukuje' ri nu jiquil, in quinbanowic chi cänimar na ri u cuinem;

²⁵ quinjekeba' na ri u cuinem xukuje' ri u takanic kas ruc' ri plo ri Mediteran c'ä ruc' ri Euprats.

²⁶ Ri are' cubij na chwe: ‘Lal ri lal nu tat; lal nu Dios ri quincolowic xukuje' quinuch'uku.’

²⁷ Quinya' na takanic pa u k'ab jas ri ya'tal che jun nabeal ala, paquiwi' conojel tak ri ajawinelab ri e c'o cho ri uwächulew.

²⁸ Ri nu lok'ok'ebal c'uxaj che man c'o ta u q'uistajic, xukuje' ri nu c'ulwächinic ruc' man c'o ta u q'uextajic.

²⁹ Ri e rija'lil quebajawin na pa ri u c'olbal amak'el, joropa' k'ij cabeytaj ri caj.

³⁰ We c'u ri e are' caquitzak can ri nu tijonic, man cajunamataj ta c'ut ri qui c'aslemal cuc' tak ri e nu takanic.

³¹ We man quequitz'akatisaj ri nu pixab, xukuje' man cäquinimaj ta ri nu takomal,

³² quinc'äjisaj na qui wäch quebenrapuj na u mac rech ri quetzelal xukuje' ri man qui nimanic taj;

³³ man quintanaba' ta c'u u lok'ok'exic ri David, mawi ma ta quintz'akatisaj ri nu jicomal ruc'.

³⁴ Man quinpaxij ta na ri nu c'ulwächinic mawi ma ta quintz'akatisaj ri nu tzij.

³⁵ Xa jumul nu banom ri chi'nic ri kas cäban na rumal rech chi kas in tastalicalaj Dios, man quinban ta c'u na tzij che ri David.

³⁶ Ri e rija'lil quebajawin na chupam ri u c'olbal, jacha' ri u beytajem ri k'ij.

³⁷ ¡Amak'el co quejeki' na jacha' ri ic'! ¡Amak'el co quejeki' na, jacha' ri u beytajem ri caj!”

³⁸ Xutum c'u ne la, xukuje' etzelam la u wäch ri ajawinel ri xcha' la; ¡lal oyowarinak ruc'!

³⁹ Paxim ri c'ulwächinic la ruc' ri pataninel ech la, q'uiakom la ri u corona cho ri ulew.

⁴⁰ Xejak la jul chque conojel ri e nimak tak u tapia; ¡xeyojyobisaj la ri e u tinimit tak!

⁴¹ Conojel ri winak queboc'owic cäqueläk'aj bic jachique ri cäcaj; ri e u c'ulja caquitze'j u wäch.

⁴² Banom la chi ri e u c'ulel cäquiyac ri qui k'ab quejajat che ch'äcanem;

⁴³ xesaj la ri u pa u chi' ri u ch'ich' re ch'o'j, man xya' ta chi la u chuk'ab pa ri ch'o'j.

⁴⁴ Chupum la ri u juluwem; q'uiakom la ri u tem re ajawibal pa ulew;

⁴⁵ xk'ip la ri junab re ri u c'aslemal nojisam c'u la che q'uixbal.

⁴⁶ Oh Ajawaxel, ¿c'ä jampa' cätanaba' la u c'u'ic ib la? ¿La c'ä cänicow ta na lo ri oyowal la jacha' ri k'ak'?

⁴⁷ Ajawaxel, nataj che la chi man naj ta quinc'asi'c; chi man naj ta quec'asi' ri winak ri e winakirisam la.

⁴⁸ ¡Man c'o ta jun cäcuinic cäc'asi'c ri ma ta c'u cäcämic! ¡man c'o ta jun ri ma ta cäbe pa ri mukubal!

⁴⁹ Ajawaxel, ¿jawije' c'o wi ri nabe lok'ok'ebal c'u'x la ri xchi'j la che ri David ruc' ronojel anima' la?

⁵⁰ Ajawaxel, chnataj che la chi ri pataninel tak ech la queyok' cumal q'ui winak; quebenc'am c'u ne bic tak we c'ax ri' pa ri wanima'.

⁵¹ Oh Ajawaxel, ¡je ka yok'ic wa' cäquiban ri e c'ulel la chke! ¡je yok'onic wa' cäquiban amak'el che ri cha'om la!

⁵² Tewichital ri Ajawaxel amak'el. ¡Je' chabanok!