Salmib 88 - Quiché Bible

Ajawaxel ¿jasche quetzelaj la nu wäch?

¹ Ajawaxel, nu Dios xukuje' nu Colonel, chi pa k'ij chi chak'ab quintz'onoj ri to'banic la,

² c'amowaj la ri nu ch'awem, choc la il che ri nu bochi'nic.

³ Sibalaj nim ri c'ax ri kajinak panuwi', chi in c'o chi chunakaj ri cämical;

⁴ “¡cuya' chic quinajilax chquixo'l ri cäminakib, man c'o ta chi c'u nu chuk'ab c'olic!”

⁵ In wonobam can chquixo'l cäminakib; in junam cuc' ri cäminakib pa ri ch'o'j, ri e muktal chic; jacha' ri e qui tzakom ri ch'ukubal uc' la, ri man quenataj ta chi che la.

⁶ In q'uiakom la bic c'ä chupam ri jul, pa k'ekumalaj tak c'olbal ri naj qui pam.

⁷ Kasan la ri oyowal la panuwi', ¡in kasan la chquixe' tak ri calal tak ri e rekbla' la!

⁸ Banom la chi xinquiya' can tak ri e wachil; banom la chi man cäquicuy ta chi nu mac. ¡In junam ruc' jun ajpache' ri man cäcuin taj quel bic!

⁹ Rumal ri sibalaj ok'ej cätajin quincanaj moy; ¡ronojel k'ij quintz'onoj tok'ob che la, Ajawaxel, quebenwalijisaj ri nu k'ab che la!

¹⁰ ¿La quebeban ta c'u la mayibal cumal ri cäminakib? ¿La quecuin ta puch ri cäminakib caquiya' maltioxinic che la?

¹¹ ¿La cätzijox ta chi c'u ri kastzij la xukuje' ri lok'ok'ebal c'u'x la pa ri mukubal, chupam ri ajawibal re ri cämical?

¹² Pa ri qui mu'jal ri cämical, jawije' ri casach wi u tza'm ronojel, ¿la c'o ta lo jachin cäyo'w u k'ij ri jicomal la xukuje' tak ri mayibal la?

¹³ Are' c'u ri in, Ajawaxel, quintz'onoj tok'ob che la; ak'abil quinpakba' ri nu ch'awem chwäch la.

¹⁴ ¿Jasche quetzelaj la nu wäch, Ajawaxel? ¿Jasche cäc'u' ib la chnuwäch?

¹⁵ Pa ri nu c'ojolal ulok nu rikom c'ax, in c'olinak ulok chunakaj ri cämical e nu coch'om xibibal tak jastak ri takom la ulok chwij, man quinch'ij ta chi c'ut.

¹⁶ Ri xibibalalaj c'anal la oc'owinak panuwi', in u ch'äcom c'ut;

¹⁷ sutim wij cumal conojel tak ri k'ij jacha' bik'onel ja.

¹⁸ E najtajisam la ri e wachil chwe xukuje' tak ri quincachilaj, are c'u ri camic xuwi junam wachil ri k'ekumalil.