Salmib 86 - Quiché Bible

Xuwi ri lal lal Dios

¹ Ajawaxel, chel c'u'x la che nu tatabexic sibalaj c'u quinbisonic xukuje' in meba';

² chinchajij la, in c'u jic chwäch la. Lal ri nu Dios; chcolo la we pataninel ech la ri' ri cu'l u c'u'x chij la.

³ Ajawaxel, chel c'u'x la chwe, amak'el c'ut quintz'onoj tok'ob che la.

⁴ Ajawaxel, chaquicotisaj la ri u c'aslibal we pataninel ech la ri', che c'u la quinsuc'uba wi ri nu ch'awem uc' la.

⁵ Rumal rech chi lal, Ajawaxel, lal utz cacuyun c'u la nim ri lok'ok'ebal c'u'x la chque ri quenatan la.

⁶ Ajawaxel, chtatabej la ri nu ch'awem, ¡choc la il che ri nu bochi'nic!

⁷ Aretak in c'o pa bis, quintz'onoj tok'ob che la, weta'm c'ut chi quinch'abej la ulok.

⁸ ¡Man c'o ta dios ri cäjunamataj ta uc' la, Ajawaxel! ¡Man c'o ta jun jasach ri cäjunamataj ta cuc' ri chac la!

⁹ Oh Ajawaxel, lal lal wocowinak conojel ri nimak tak tinimit, quepe c'u na uc' la che k'ijilaxic la xukuje' che u ya'ic u k'ij ri bi' la.

¹⁰ Xuwi c'u ri lal lal Dios; ¡nim banic la xukuje' queban la tak mayibal!

¹¹ Ajawaxel, chc'utu' la ri be la chnuwäch, rech quintakej ruc' colomal. Chbana' la chi ri wanima' nim cäril wi ri bi' la.

¹² Wajaw, nu Dios, quink'ijilan na che la ruc' ronojel ri wanima' xukuje' quinya' u k'ij ri bi' la amak'el.

¹³ ¡Man c'o ta u q'uisic ri lok'ok'ebal c'u'x la chwe! ¡In esam la pa u k'ab ri cämical!

¹⁴ Oh Dios, e juk'at winak ri man c'o ta qui q'uixbal xukuje' e banal tak c'ax, ri man c'o ta patan la chque, qui walijisam quib chwij, cäcaj c'ut quinquicämisaj.

¹⁵ Are' c'u ri lal, Ajawaxel, lal jun Dios ch'uch'uj ri quel c'u'x la, coch'onel, lal lok'ok'ebal c'uxaj ronojel xukuje' kastzij.

¹⁶ Chinila' la, ¡chel c'u'x la chwe! Chya' la u chuk'ab chto'tajisaj la we pataninel ech la ri'.

¹⁷ Ya' la jun k'alajalaj u c'utic ri utzil la chnuwäch, aretak c'ut caquilo, chel qui q'uixbal ri cäquetzelaj nu wäch. ¡Lal, Ajawaxel, cäya' la to'banic chwe xukuje' cu'bisabal c'uxaj!