Salmib 85 - Quiché Bible

Chujto'tajisaj chi la jumul

¹ Ajawaxel, lal sibalaj lal uxinak utz ruc' we ulew la ri'. Tzalim la ri u utzilal che ri Jacob;

² cuyum la ri retzelal ri tinimit la xukuje' ronojel ri u mac;

³ jamarisam la ronojel ri u k'ak'al ri oyowal la.

⁴ Dios xukuje' ka colonel, ¡chujto'tajisaj ba la camic xukuje' mätakej la oyowaric chke!

⁵ ¿La xa ta pu lo cätakej na la u yukic rakan ri oyowal la pakawi'?

⁶ ¿La ma ta cäya' chi na la ka c'aslemal, rech cäquicot ri tinimit la uc' la?

⁷ Oh Ajawaxel, ¡c'utu' la ri lok'ok'ebal c'u'x la chkawäch xukuje' ri ka to'tajisaxic umal la!

⁸ Quintatabej na ri cuya' u bixic ri Ajawaxel; cutzijoj c'u na jamaril che ri u tinimit, chque ri e jic ruc', rech man quequibana' ta chic ch'ujilal.

⁹ Kastzij, ri Dios sibalaj nakaj c'o wi, che qui colic ri queyo'w u k'ij; ri u juluwem cäjeki' pa ri ka tinimit.

¹⁰ Ri lok'ok'ebal c'uxaj xukuje' ri kastzij cacuc'aj na quib, ri jamaril xukuje' ri colomal cäquitz'umaj na quib,

¹¹ ri kastzij cätuxin na ulok pa ri ulew, ri colomal cäca'y na ulok chicaj.

¹² Ri Ajawaxel are cäc'amow na ulok ri jäb, cäwächin c'u na ri kulew.

¹³ Ri colomal cänabej na chuwäch are', cusuc'umaj c'u na ri u be.