Salmib 84 - Quiché Bible

Sibalaj quinrayij ri c'olem chupam ri achoch la

¹ ¡Sibalaj je'l ri cak'ijilax wi la, Ajawaxel ri c'o ronojel cuinem la!

² ¡Sibalaj quincäm che u rayixic ri c'olem chupam ri uwo ja rech ri achoch la! ¡Ruc' ronojel ri wanima' quinbixon che ri Dios ruc' quicotemal, ri ajchak'e ri c'aslemal!

³ Xukuje' ne ri tz'unun, ri xipicar caquirik c'olbal chquinakaj tak ri porobal ri e ech la, jawije' caquiban wi qui soc ri alaj tak cal, Ajawaxel ri c'o ronojel u cuinem, wajawinel xukuje' nu Dios.

⁴ ¡Sibalaj e tewichital ri e jekel chupam ri achoch la man quetani' ta che u ya'ic k'ij la!

⁵ ¡Sibalaj utz que ri cäquirik to'bal quib uc' la, ri qui rayinic are ri opanem pa ri juyub la!

⁶ Aretak queboc'ow chupam ri beya' que u wa'l tak wächaj quinjalwächij na pa bulbux ja', xukuje' ne ri jäb cunojisaj na che tak tewichibal;

⁷ cäbe c'u na u q'uiyic ri qui chuk'ab, pa Sion c'ut cäquil wi na u wäch ri Dios ri c'o puwi' ronojel.

⁸ Ajawaxel, Dios ri c'o ronojel u cuinem, u Dios ri Jacob, ¡chtatabej la ri nu ch'awem!

⁹ Nu Dios, ch'ukul kech, chila la ulok ruc' elebal c'uxaj ri ajawinel ri xcha' la.

¹⁰ ¡Are c'o na quechbex che ri jun k'ij c'olem chquiwäch ri uwo ja' re ri achoch la, chuwäch ri jun mil naj chque! Are utz na pune' ta ne' xa in chajil rech ri u chi' ri rachoch ri nu Dios, che u q'uexwäch ri quinc'oji' pa tak c'olbal re etzelal.

¹¹ Rumal rech chi ri Dios ri Ajawaxel cujutunuj xukuje' cujuch'uku; ri Ajawaxel quebulok'ok'ej, xukuje' nim queril wi ri man c'o ta qui bach'uyal, man cuk'il ta qui ya'ic ri utzalaj tak jastak chque.

¹² Ajawaxel c'o ronojel cuinem la, sibalaj e tewichital ri caquicu'ba' qui c'u'x chij la.