Salmib 83 - Quiché Bible

Ch'awem che u tz'onoxic ri u to'banic ri Dios

¹ Oh Dios, ¡xak mayine' la! ¡xak mäcanaj la ma ta c'u mat chi slab la, ma ta c'u mat chi ch'aw la!

² Checa'yej la ri e c'ulel la, ri cäquetzelaj wäch la: quewojcoric, quiyacom quib chij la.

³ E qui banom itzel tak subunic che u banic c'ax che ri tinimit la, ¡xukuje' chque ri e ch'ukum la!

⁴ Qui chomam quepe che u sachic ka wäch ma ta c'u cäkatakej c'aslemal jacha' nim tinimit rech man cänatax ta chic ri u bi' ri Israel.

⁵ Qui banom jun c'ulwächinic che c'ulelaxic la, qui walijisam quib e jacha' ta ne xa jun winak:

⁶ Ri e rajch'ojab ri Edom xukuje' ri e rech ri Ismael, ri e rija'lil ri Agar xukuje' ri e rech ri Moab,

⁷ ri Jebal, ri Amon xukuje' ri Amalec, ri aj pilisteyib ri e jekel pa Tir,

⁸ xukuje' ne ri aj asiriyab qui junam quib cuc', e are wa' ri e ya'l qui chuk'ab ri e ralc'ual ri Lot.

⁹ Bana' la chque jas ri xban la chque ri aj Madian, jas xban la che ri Sisara, jas ri xban la che ri Jabin chuchi' ri alaj nima' re Sison,

¹⁰ ri xsachisax qui wäch pa Endor; ¡ri xebux qui mes awaj!

¹¹ Bana' la chque ri achijab ri nimak qui k'ij jas ri xban la che ri Oreb xukuje' ri Zeeb; bana' la chque conojel ri c'amal tak qui be jas ri xban la che ri Zeb xukuje' ri Zalmun,

¹² ri are ta xcaj xequechbej ri yuk'bal ri e rech ri Dios.

¹³ Nu Dios, bana' la chque chi quebux jun salc'um, e jacha' chaki'j u xak tak che' ri quec'am bic rumal ri quiakik';

¹⁴ je jacha' ri k'ak' ri cuporoj ri c'ache'laj, cuq'uis tzij paquiwi' tak ri k'ayes cumal tak ri rak',

¹⁵ ¡je chbana' la che cokataxic ruc' ri banbal c'ax la, chexibij la cumal tak ri cakulja la!

¹⁶ ¡Chesaj la qui q'uixbal, Ajawaxel, rech quepe che u to'ic quib uc' la!

¹⁷ Amak'el chel qui q'uixbal; ¡cheq'uixok, checämok!

¹⁸ ¡Chquetamaj chi xuwi ri lal lal Ajawaxel, chi xuwi ri lal lal aj chicaj puwi' ronojel ri uwächulew!