Salmib 81 - Quiché Bible

Ri rutzil ri Dios xukuje' ri retzelal ri Israel

¹ ¡Chibixoj ri Dios ruc' quicotemal, ri are' ka chuk'ab! ¡Chibixoj ri u Dios ri Jacob ruc' rakoj chi'aj re quicotemal!

² Chixbixon ruc' tzojtzoj, ruc' ri je'lalaj arp xukuje' ri nimalaj arp.

³ Chiwok'esaj trompet aretak cäpe ri c'ac' ic', xukuje' aretak cänoj ri ic', are c'u u k'ijol ri nimalaj ka nimak'ij.

⁴ Are c'u takomal wa' ri u yo'm ri u Dios ri Jacob che ri Israel;

⁵ are takanic wa' yo'm che ri Jose aretak ri Dios xpe che u c'äjisaxic u wäch ri Ejipt. Xinta' jun ch'abal ri man weta'm ta jachin ajchak'e:

⁶ “Wesam ri eka'n ri e c'o paquiwi' tak ri e a teleb, xatinwesaj pa ri c'axalaj chac.

⁷ Xinasiq'uij aretak at c'o pa bis, xatinto' c'ut; xatinch'abej ulok pa ri sutz' ri cätililic; xatinc'ambejej chuchi' ri ja' re Merib.

⁸ Nu tinimit, chatatabej ri nu pixbenic; ¡c'o ta banom wi chi quinanimaj, Israel!

⁹ Mec'oji' qui diosib jule' tak winak chic iwuc'; mebak'ijilaj jule' tak diosib chic.

¹⁰ In ri' ri Ajawaxel, ri a Dios, ri xatesan ulok pa Ejipt; chajaka' ri a chi', catinnojisaj c'u na.

¹¹ Are c'u ri nu tinimit man xraj ta xinutatabej; ¡ri Israel man xraj taj xinunimaj!

¹² Rumal ri' xinya' be chque chi xquibano jachique kas ri xcaj xquibano are' c'u xquiban ri itzel qui rayibal.

¹³ ¡We ta xinutatabej ri nu tinimit! ¡we ta ri Israel xebutakej ta ri e nu be,

¹⁴ pa jun qui jakic xukuje' pa qui tz'apixic bak'wächaj in xebenmach'irisaj ta ri' ri e u c'ulel xinc'äjisaj ta qui wäch ri' ri quec'ulelanic!”

¹⁵ Ri itzel caquil wi ri Ajawaxel quepe na chuwäch, caquimach' quib pa nimalaj xe'n ib, are c'u ri qui c'okotajic canajinak junalic paquiwi'.

¹⁶ Ri Dios xutzuk ri u tinimit ruc' ri utzalaj trico, xresaj ri u chaki'j chi' ruc' ri juyubal räx cab.