Salmib 80 - Quiché Bible

¡Utz kilic chbana' la!

¹ Yuk'ul re ri Israel, ri cäc'am la u be ri Jose jacha' jumulaj chij, ri cojom la ri tem la re ajawibal paquiwi' ri aj cajalaj tak to'banelab ri e c'o qui xic', ¡Tatabem la! ¡Utz rilic ri Eprain chbana' la,

² ri Benjamin xukuje' ri Manases, chc'astaj la, saj la che ka to'ic ruc' ri cuinem la!

³ Ka Dios, ¡chbana' la chi cujux chi jumul jas ri kabanic canok nabe! ¡Utz kilic chbana' la, cujto'taj c'u na ri'!

⁴ Ajawaxel, Dios ri c'o ronojel u cuinem, ¿C'ä jampa' catakej la oyowarem che ri u bochi'nic ri tinimit la?

⁵ Yo'm la u wa'l wächaj chke che u q'uexwäch ka wa; che kuq'uia' u wa'l tak wächaj ri cätixixic.

⁶ Banom la chke chi uj uxinak qui tze' ri e ka c'ulja, e are' c'ut ri e ka c'ulel chäquitze'j ka wäch.

⁷ Dios ri c'o ronojel u cuinem, ¡bana' la chi cujux chi jumul jas ri ka banic canok nabe, chujca'yej la cuc' utzalaj tak bak'wäch la cujto'taj c'u na ri'!

⁸ Pa Ejipt xesaj wi la ulok juwi' uva; xerokij la bic ri quequik'ijilaj tak diosib xtic c'u la.

⁹ Xjosk'ij la ri ulew che, ri juwi' uva xujabuj ri u c'amal, xunojisaj c'u ri ulew.

¹⁰ Ruc' ri u mu'jal xebuch'uk tak ri juyub, cuc' tak ri e u k'ab xebuch'uk tak ri nimak tak che'.

¹¹ Xopan tak ri e u k'ab c'ä chuchi' ri plo, xtuxin c'ä chuchi' ri nima' Euprats.

¹² ¿Jasche xyojij la ri k'atibal rij, xya' la be chi quech'up tak ri e u uva cumal ri queboc'ow pa ri be?

¹³ Ri juyubal ak cupatz'alej; ¡ri juyubal tak awaj caquiwako!

¹⁴ Dios ri c'o ronojel u cuinem, bana' la tok'ob tzelej la ulok; kas chca'y la ulok chicaj chel c'u c'u'x la che we juwi' uva ri'.

¹⁵ Ri juwi' uva ri lal xticow la, che ri tuxaj ri lal xjekeban la.

¹⁶ Sacha' la qui wäch ruc' ri oyowal la jachin tak ri quek'ajowic, cäquiporoj c'ut;

¹⁷ chto' c'u la ri winak ri cha'om la, u tux winak ri kas lal co xjekeba la,

¹⁸ mawi c'u jubik' cäkatas ta chi na kib chij la. ¡Ya' la ka c'aslemal, xuwi c'u ri lal cäkanataj la!

¹⁹ Wajaw Dios, Dios ri c'o ronojel u cuinem, ¡bana' la chi cujux chi jumul jas ri ka banic canok nabe! ¡Chujca'yej la cuc' utzalaj tak bak'wäch la cujto'taj c'u na!