Salmib 79 - Quiché Bible

K'ak'anibal anima'aj chuwäch ri u yojixic ri Jerusalen

¹ ¡Nu Dios, ri quequik'ijilaj tak diosib qui majim ri jastak ech la! ¡Cawasim ri tastalicalaj achoch la quiyojyobisam c'ut ri Jerusalen!

² ¡Xequiya' can ri cäminak tak qui cuerp ri pataninel tak ech la, ri jic xebin chwäch la, rech quet'ubix cumal tak ri c'uch xukuje' cumal ri juyubal tak awaj!

³ Jacha' ja' xquijamij ri qui quiq'uel pa ronojel ri Jerusalen, man c'o ta c'u jun xemukuwic.

⁴ Cätze'x ka wäch cumal ri e ka c'ulja; uj yacal qui tze' joropa' ri cujilowic.

⁵ Oh Ajawaxel, ¿c'ä jampa' coc'ow ri oyowal la? ¿La xak cätajin wi cänicow ri oyowal la jacha' ri k'ak'?

⁶ ¡Jamij ri oyowal la paquiwi' ri ajawibal ri quequik'ijilaj diosib ri man queta'm ta wäch la, mawi cäya' k'ij la cumal!

⁷ E are' c'ut xebik'ow ri Jacob, xequiyojij c'ut ri c'o pa ri rulew.

⁸ Mäban la chi uj ta cujtojow ri quetzelal ri e ka mam; ¡pet ba ri ch'uch'ujil la chanim che ka to'ic, xa c'u co'l man quel kanima'!

⁹ Nu Dios, ka colonel, chujto' la, ¡chujesaj la pa ri c'ax, chäsacha' la ri ka mac, rumal ri u juluwem ri bi' la!

¹⁰ Man c'o ta chi jasche caquibij ta chi na ri e k'ijilal tak diosib: “¿Jawije' c'o wi ri qui Dios?” Chya' la chke chi cäkil ri u tojic rajil u q'uexel ri qui cämical ri pataninel tak ech la. ¡Chquetamaj xukuje' ri e k'ijilal tak diosib!

¹¹ Choc la il che ri qui ch'ach'atem ri e c'o pa tak che', cheto'tajisaj la ruc' ri nimalaj cuinem la ri cämisaxic quij.

¹² Oh Ajawaxel, chya' la wukub mul rajil u q'uexel chque ri e ka c'ulja qui mac quech ri c'axc'obisanic ri qui banom che la.

¹³ Ri uj c'ut ri uj tinimit la, ri uj chij rech ri yuk'bal la, cäkaya' na maltioxinic che la amak'el; ¡cujbixon na che la chbe k'ij sak!