Salmib 78 - Quiché Bible

Ri jastak ri xebuban ri Dios che u to'ic ri u tinimit

¹ Nu tinimit, chatoc il che ri nu tijonic; ¡chaya' a xiquin che u tatabexic ri quinbij chawe!

² Quintzijon pa c'ambal tak tzij; quebenbij na jastak ri e c'u'tal ulok kas pa tak ri ojer tak k'ijol.

³ Ri jastak ri e ka tom xukuje' ri e ketamam, ri xetzijox chke cumal ri e ka mam,

⁴ man cäkac'u' ta chquiwäch ri kalc'ual. Quekachilaj na ri ija'lil ri quepe na cakak'ijilaj na ri Ajawaxel cakatzijoj na ri u cuinem xukuje' tak ri u mayibalil.

⁵ Ri Dios xujekeba' jun pixab che ri Jacob; xujuch' ri be ri rajawaxic cutakej ri Israel, xuya' takanic chque ri e ka mam chi cäquic'ut chquiwäch ri calc'ual,

⁶ rech cäquetamaj ri alc'ualxelab ri quepe na, ri alc'ualxelab ri quebalax na, e are' chi c'ut cäquic'ut chi can chquiwäch ri calc'ual;

⁷ rech cäcu'bi qui c'u'x chrij ri Dios xukuje' ma ta cäsach pa qui jolom ri jastak ri e u banom ri Dios; rech quebequinimaj tak ri e u takomal

⁸ je c'u mebuxic e jacha' ri e qui mam man ch'abexic ta xcaj xukuje' man etal ta tzij, man co ta xtiqui ri canima' xukuje' ri cuxlabal; ¡ija'lil ri man e jictaj chuwäch ri Dios!

⁹ Ri aj ramak' ri Eprain, ri cuc'am qui ch'ab, ri e are' xquiya' ri uwo cachak pa ri k'ij re ch'o'j;

¹⁰ man nim ta xquil wi ri qui c'ulwächinic ruc' ri Dios mawi ne' xcaj xeniman ta che ri u tijonic.

¹¹ Xsach pa qui jolom ri u banom ri are', ri mayibal ri xebuban chquiwäch.

¹² Ri Dios xebuban mayibal chquiwäch ri e qui mam pa ri ulew Zoan, ri c'o pa Ejipt:

¹³ Xuban quieb che ri plo xeroc'owisaj c'u chupam, ri ja' xux jacha' jun nim tapia.

¹⁴ Pa k'ij xuc'am qui be ruc' jun sutz', chak'ab xuc'am qui be ruc' ri u nicowem k'ak'.

¹⁵ Chupam ri chaki'j uwo sak xuban cacab chque ri tac'atak tak abaj, xuya' q'ui ja' ri xcuq'uiaj.

¹⁶ ¡Ri Dios xubano chi xel ulok ja' cätixixic chupam jun tac'atic abaj!

¹⁷ Ri e are' c'ut xquitakej u banic mac chuwäch ri Dios; xquic'ulelaj ri Dios ri c'o chicaj chupam ri chaki'j uwo sak.

¹⁸ Xcaj xquic'ambejej xquita' qui wa cuq'uia' che jas ri xcaj.

¹⁹ C'ax xech'aw che, xquibij: “¿La xa puch cäcuin ri Dios che u ya'ic jun je'lalaj wa'im chke chupam ri chaki'j uwo sak?

²⁰ Kastzij chi ri Dios xuban quieb che ri nimalaj abaj; ri xel wi ulok ja' chupam jacha' jun nima', ri xuch'akaba' ri ulew; ¿la cäcuin ta c'u lo xukuje' cuya' wa? ¿la cäcuinic lo cuya' ti'j che ri u tinimit?”

²¹ Aretak xuta' ri Ajawaxel ri xquibij, xyactaj royowal; ¡xk'ak'aric, jacha' jun k'ak' xnicow chrij ri Jacob!

²² U mac rech chi man xquicu'ba' ta qui c'u'x chrij ri Dios, mawi xquic'amowaj ri u to'banic ri xuya' chque.

²³ Pune' c'u jewa', ri Dios xuya' takanic chque ri sutz', xebujak ri u chi' ri caj;

²⁴ ¡xubano chi xjabin jaswa' puwi' ri u tinimit, trico ri xpe chicaj, rech cäquitijo!

²⁵ ¡Ri winak xquitij qui wa tako'nib aj caj! ¡Ri Dios xuya' q'ui ri qui wa ri caquitijo!

²⁶ Ri quiakik' re elebal k'ij, ri quiakik' re u mox elebal k'ij xejich'ich' cho ri caj; ¡ri Dios xebuc'am ulok ruc' ri u cuinem!

²⁷ Xujabij ti'j puwi' ri u tinimit; ¡xejabin sakco'r jacha' ri sanyeb re ri plo!

²⁸ Ri Dios xubano chi xetzak pa u niq'uiajil ri kajebal ri e c'o wi xukuje' pa u xcut tak ri lic'om cachoch.

²⁹ Xquichaplej c'u qui tijic c'ä xenoj na, jewa' xuban ri Dios che u ya'ic chque ri xcaj.

³⁰ C'ä maja' c'u ne coc'ow ri qui jik'al, c'ä cätajin caquiba' ri qui wa,

³¹ aretak xkaj ri royowal ri Dios paquiwi', xebucämisaj ri cowilaj tak achijab. ¡Xubano chi xecäm ri achijab ri sibalaj e utz na pa Israel!

³² Pune' c'u je xquic'ulmaj wa', xemacun chi jumul; man nim ta xquil wi ri mayibal ri xebuban ri Dios.

³³ Rumal ri' ri Dios xuq'uis tzij puwi' ri qui c'aslemal e je ta ne xa jun uxlabic, pa u niq'uiajil jun xibin ib xibibal.

³⁴ We ri Dios cuban chque chi quecämic, c'äte ri' queboc che u tzucuxic; quetzelej chi jumul ruc', man quebuxlan ta che u tzucuxic;

³⁵ c'äte c'u ri' cänataj ri Dios aj chicaj chque ri quebuchajij xukuje' quebuch'uku.

³⁶ Ruc' c'u ri qui chi' xukuje' ri cak', cäquibij je'lalaj tak banoj tak tzij che,

³⁷ mawi jubik' xux ta jic ri canima' chuwäch, mawi xebin ta jic pa ri u c'ulwächinic.

³⁸ Xel c'u u c'u'x ri Dios chque, xucuy ri quetzelal, man xusach ta qui wäch; q'ui mul xak xoc'ow ri royowal man xuya' ta be chi xk'ak'ar ta rumal ri royowal.

³⁹ Xnataj che ri Dios chi xak e winak; chi xa e junam ruc' ri quiakik' ri cabec, man catzelej ta chi ulok.

⁴⁰ ¡Q'ui mul man xeniman ta che ri Dios, xquiya' k'ak'anibal anima' che pa ri chaki'j uwo sak!

⁴¹ Q'ui mul xquic'ambejej; ¡xquiya' bis che ri Tastalic ri c'o pa Israel!

⁴² Man xnataj ta ri k'ij chque aretak ri Dios ruc' ri u cuinem, xeresaj pa u k'ab ri c'ulel;

⁴³ aretak xebuban nimak tak jastak ri e mayibal pa ri ulew re Zoan, ri c'o pa Ejipt;

⁴⁴ aretak xebujalwächij ri nima' pa quic' ri aj ejiptib man xecuintaj xcuq'uiaj ri qui ja'il ri nima'.

⁴⁵ Xebutak ulok alaj tak amaloyib xukuje' xtutz'ab paquiwi'. Ri ronojel caquibik'o xukuje' xquisach u wäch;

⁴⁶ xebujach ri u wächinic ri ulew chque tak ri sac' ri qui rikom c'ax che qui t'iquic.

⁴⁷ Xusach qui wäch ri qui uva xukuje' ri qui higo ruc' sakbach xukuje' ruc' sakalaj tew.

⁴⁸ Ri e qui wacax xukuje' ri e qui chij xecäm can chuxe' ri sakbach xukuje' ri cakulja.

⁴⁹ Ri Dios xutak ulok ri royowal paquiwi' ri cäk'ak'anic: oyowal, c'okonic xukuje' c'axc'olil, xebucoj che u tako'n che u banic c'ax chque.

⁵⁰ ¡Xutzokopij u chuk'ab ri royowal! Man xutok'obisaj ta u wäch ri qui c'aslemal, xane' xebujach pa ri cämical;

⁵¹ ¡xubano' chi xcäm kas pa Ejipt ri nabeal c'ojolaxel re conojel ri jujun tak ja winak pa Ejipt!

⁵² Xresaj ulok ri Israel jacha' juk'at chij; xuc'am bic u be ri u tinimit pa ri chaki'j uwo sak;

⁵³ utz xuban bic che qui c'amic rech man cäquixe'j ta quib, e are' c'u ri e qui c'ulel xemuktaj can chupam ri plo.

⁵⁴ Ri Dios xuc'am ulok ri u tinimit xuya' chupam ri tastalicalaj rulew; ¡pa tak ri c'ache'laj ri kas are' xch'äcowic!

⁵⁵ Xeresaj bic ri winak ri e k'ijilal tak diosib ri man queta'm ta u wäch Dios chquiwäch ri aj israelib; xujach ri ulew pa ch'akatak chque tak ri ramak'. Xebujekeba' pa ri ulew ri xujach chque.

⁵⁶ Ri e are' c'ut xquic'ambejej ri Dios ri c'o chicaj, xquiwalijisaj quib chrij, man xquinimaj ta ri u takanic;

⁵⁷ je xquibano jas ri xequiban ri qui mam, xquixutuj canok, man xebin ta jic chuwäch; ¡xejech'obic jacha' jun subunelalaj q'uiakbal ch'ab!

⁵⁸ Xquiyac royowal cumal tak ri qui porobal ri quequik'ijilaj wi tak diosib; xequik'ijilaj tak ri diosib, xquiyac ri rachixomanic.

⁵⁹ Ri Dios xpe royowal aretak xril wa' kas c'u xuxutuj ri Israel,

⁶⁰ xuwonoba' c'u can ri k'ijilabal ri xc'oji' can pa Sil, ri are rachoch chquixo'l ri winak.

⁶¹ Xuya' be chque ri c'ulel chi xqueläk'aj bic ri retal ri u juluwem xukuje' ri re ri u cuinem.

⁶² Sibalaj c'u xk'ak'ar chrij ri u tinimit, xukuje' xujach pa u chi' ri u ch'ich' re ch'o'j ri c'ulel.

⁶³ Ri alabom xeporoxic rech quecämic; ¡man c'o ta chi bix re c'ulanem chque ri alitomab!

⁶⁴ Ri e cojol ri tabal tok'ob xecäm pa u chi' ch'ich' re ch'o'j, man xok'ex ta qui wäch cumal ri e qui malca'nib.

⁶⁵ Xc'astaj c'u ri Ajawaxel, jacha' che jun waram, jacha' jun ajch'o'j ri xpacun ri u wa'l uva pa u jolom,

⁶⁶ xebuch'äc c'ut ri e u c'ulel, xuban chque chi xebanimajic; ¡xebuch'uk ruc' junalic q'uixbal!

⁶⁷ Xupakchi'j c'u apan ri rachoch ri Jose; man are ta xucha' ri ramak' ri Eprain;

⁶⁸ are' c'u xucha' ri ramak' ri Juda xukuje' ri Sion ri u juyub ri lok' chuwäch.

⁶⁹ Xuyac jun k'ijilabal tac'atic, jacha' ri caj, junalic c'ut xujekeba', jacha' ri ulew.

⁷⁰ Xucha' ri David ri pataninel rech, ri ajyuk' chij canok nabe;

⁷¹ xuresaj chquij ri chij rech cuchajij ri u tinimit, rech are' cayuk'un ri Israel.

⁷² Are c'u ri David xuchajij ri u tinimit ri Dios; xebuchajij xuc'am c'u qui be ruc' k'abaj nawinel xukuje' animaj ri jic.