Salmib 77 - Quiché Bible

Chomanic paquiwi' ri e u banoj ri Dios

¹ Co quinrak nu chi' che u tz'onoxic tok'ob che ri Dios rech quinutatabej.

² Ri k'ij aretak quinbisonic, quintzucuj ri Ajawaxel, amak'el c'ut quebenyac ri e nu k'ab pa ri u banic ch'awem ruc' Dios pa tak ri chak'ab. Ri nu c'aslibal man curik ta cu'lbal c'uxaj.

³ Cänataj ri Dios chwe, quinok' c'ut; quinkaj che chomanic, cuban quieb nu c'u'x.

⁴ Lal, Ajawaxel, man cäya' ta la chwe chi quebenyupuba' ri e nu bak'wäch; ¡sibalaj in moxirinak, man quincuin ta quinch'awic!

⁵ Quebenchomaj ri k'ij xukuje' tak ri junab ri e oc'owinak;

⁶ cänataj chwe aretak quinbixon chak'ab. Quinchoman pa wanima', quinc'ot c'u na nu chi':

⁷ ¿La xak lo amak'el royowal ri Ajawaxel? ¿La ma ta lo cuban chi na utzil chke?

⁸ ¿La xa lo xq'uis ri lok'ok'ebal u c'u'x? ¿La xa man cuban ta chic jas ri u bim?

⁹ ¿La xa lo xsach ri rutzil ri Dios pa u jolom? ¿La xa lo sibalaj oyowarinak, chi man quel ta chi u c'u'x chke?

¹⁰ Ri sibalaj c'ax cuban chwe are ri u chomaxic chi ri aj Chicaj man je ta chic kuc' jacha' ri nabe.

¹¹ Quenataj na chwe ri mayibal ri xebuban ri Ajawaxel pa jujun tak k'ijol canok;

¹² quinchoman chrij ronojel ri u banom.

¹³ Oh Dios, lal tastal pa tak ri banoj la; ¿jachin ta ri dios ri sibalaj ta nim ri c'olic jacha' ta ri lal?

¹⁴ ¡Lal ri' ri Dios ri queban tak la mayibal! ¡Xc'ut ri cuinem la chquiwäch ri nimak tak tinimit!

¹⁵ Ruc' ri cuinem la xlok' chi na la ri tinimit la, ri e u c'ojol ri Jacob xukuje' ri e rech ri Jose.

¹⁶ Nu Dios, aretak xil la rumal ri plo xuxe'j rib, xeyicop ri e u ja'il ri e c'o c'ä chuxe';

¹⁷ ri sutz' xquitzokopij ulok ri jäb xetataj cakulja pa ri caj, xukuje' caypa' pa ronojel c'olbal.

¹⁸ Xetataj ri cakulja la pa ri salc'um; xsakar ri uwächulew cumal tak ri caypa' la, ri uwächulew xyicop cumal tak cabrakan.

¹⁹ Xjak ri be la chupam ri plo; xeramij la nimak tak ja', man c'o ta c'u jun xrikow ta ri retal ri akan la.

²⁰ Xc'am la u be ri tinimit la jacha' jumulaj chij, rumal ri Moises xukuje' ri Aaron.