Salmib 76 - Quiché Bible

Ri Dios ri ch'äcanel

¹ Ri Dios etamatal u wäch pa Juda; ri u bi' elinak u tzijol pa Israel.

² Ri rachoch c'o puwi' ri juyub Sion, pa Jerusalen;

³ chila' xebumuch wi tak ri e banbal tak ch'ojibal: ri quetecak tak ch'ich', ri ch'ich' tak re ch'o'j, ri q'uiakbal tak ch'ab xukuje' tak ch'ab.

⁴ ¡Sibalaj nim ri juluwem la, nu Dios! ¡C'o na ri nimalil la chquiwäch ri juyub k'eku'm tak c'ache'laj ri e c'o wi' awaj!

⁵ Ri achijab ri e c'o qui cuinem xtokix ri jastak quech; ri c'o na qui chuk'ab man c'o ta xecuin che u banic; xcoc'owisaj ri q'uisbal qui waram.

⁶ Ri carwaj xukuje' ri quiej man quecuin ta chic queslabic aretak ri lal, nu Dios u Dios ri Jacob, cäcoj la qui xib.

⁷ ¡Ri lal lal xibibal! ¿Jachin ta ri cäcuinic cutac'aba' rib chwäch la aretak lal oyowarinak?

⁸ Pa ri caj cäc'ut wi la ulok ri k'atan tzij la; ri uwächulew cuxe'j rib xak jun chi cac'oji' wi,

⁹ nu Dios, aretak cäwalij la che u banic suq'uilal xukuje' che qui to'ic ri e c'axc'obinak cho ri uwächulew.

¹⁰ Ri royowal ri winak caq'uextaj che yabal k'ij la, xukuje' ne ri xa jubik' royowal caq'uextaj pa corona la.

¹¹ Chibana' chi'nic chuwäch ri Ajawaxel, ri i Dios, chebitz'akatisaj c'ut; ix ri i mulin iwib chrij ri ya'tal u ya'ic u k'ij, ¡chebic'ama ulok sipanic che!

¹² Ri are' cäresaj ri qui c'aslemal ri c'amal tak be, cuya' xe'n ib chque tak ri ajawinelab ri e c'o cho ri uwächulew.