Salmib 75 - Quiché Bible

Ri Dios, ri K'atal Tzij

¹ Cujmaltioxin che la, nu Dios, cujmaltioxin che la; cäkaya' u k'ij ri bi' la, quekabixoj tak ri mayibal ri e banom la.

² Ri Ajawaxel cubij: “Apachique k'ij ri quinwaj, quink'at na tzij ruc' colomal

³ Aretak cäyicop ri uwächulew, querachilaj conojel ri winak ri e c'o chuwäch, in in banowinak chi co e tac'al ri e u tiq'uilibal.”

⁴ Chque ri banal tak nimal xukuje' chque ri banal tak etzelal, quinbij: “Minimarisaj i k'ij, xukuje' miban nimal;

⁵ sibalaj miya' u k'ij ri i cuinem mixux nimol iwib aretak quixch'awic.”

⁶ Ri to'banic man cäpe ta pa elebal k'ij mawi pa ri u kajebal k'ij, mawi pa ri chaki'j uwo sak re ri u mox k'ij,

⁷ xane' are' ri Dios are' ri k'atal tzij: jujun quebumach'irisaj, jujun chic cunimarisaj qui k'ij.

⁸ Ri Ajawaxel c'o ri u q'uiakbal ri royowal pa u k'ab nojinak che u wa'l uva ri yujtalic xukuje' k'obisam, aretak cutix we u wa'l uva ri' conojel ri banal tak etzelal ri e c'o cho ri uwächulew cäcuq'uiaj na ri q'uisbal jutz'ut.

⁹ Ri in amak'el quinwesaj na u tzijol ri u Dios ri Jacob xukuje' quebenbixoj na bix che,

¹⁰ ri are' cusach na u wäch ri nimal ri quec'amow ri banal tak etzelal, cunimarisaj c'u na ri u cuinem ri utzalaj winak.