Salmib 74 - Quiché Bible

Ch'awem ruc' Dios catz'onox ri u torotajic ri tinimit

¹ Nu Dios, ¿jasche xujwonoba' la canok? ¿Jasche xnicow ri oyowal la paquiwi' ri chij la re ri yuk'bal la?

² Chnataj ri tinimit la che la, ri xrik la ulok ojer pa ri tiquiritajic, ri xlok' la rech cux chi ech la; chnataj ri juyub re Sion che la, ri jekelinak wi la.

³ Pet la che rilic we yojyobic ri man c'o ta u q'uisic; ¡ri c'ulel u yojim ronojel ri c'o chupam ri k'ijilabal!

⁴ ¡Ri e c'ulel la cäquibixoj ch'äcanic chupam ri cak'ijilax wi la! ¡e qui cojom ri quetal ri man e aj chi' taj,

⁵ puwi' ri oquibal ri caban wi oquem! E je ta ne banal tak si' pa jun k'ekumalaj c'ache'laj,

⁶ icäj xukuje' k'osibal xequipaxibej tak quech ri wikbal ri e re che'.

⁷ Xquiporoj ri cak'ijilax wi la ¡xquesaj u q'uixbal ri achoch la, xquit'akij c'ä cho ri ulew!

⁸ Xquichomaj u sachic ka wäch konojel; ¡xequiporoj conojel tak ri c'olbal pa tak ri tinimit ri cäkamulij wi kib che k'ijilaxic la!

⁹ Man quekil ta chic ri e tastalicalaj tak ketal; man c'o ta chi jun k'axal tzij la; mawi ne keta'm joropa' junab cäbeytaj na wa'.

¹⁰ Nu Dios, ¿c'ä jampa' lo cutanaba' ka yok'ic ri c'ulel? ¿C'ä jampa' lo cutakej na ka yok'ic?

¹¹ ¿Jasche cac'u' ri k'ab la ri c'o nimalaj u cuinem? ¿Jasche xak k'alum ri k'ab la?

¹² Ojer ulok, lal ri' ri lal wajawinel; Lal, nu Dios, xerik la q'ui tak ch'äcanic pa u niq'uiajil ri uwächulew:

¹³ Xban la quieb che ri plo ruc' ri cuinem la; xpaxij la ri qui jolom ri nimak tak awaj ri e c'o chupam ri plo;

¹⁴ xwech' la ri qui jolom ri nimak tak Lebiatan, xya' c'u la che tzukbal quech ri juyubal tak awaj ri e c'o chupam ri chaki'j uwo sak.

¹⁵ Xban la chi xepok'isaj tak la ulok ja' xukuje' tak nima', xetzajisaj c'u la tak nima' ri man c'o ta qui tzajic.

¹⁶ E ech c'u la ri pa k'ij xukuje' ri chak'ab, lal xjekeban la ri ic' xukuje' ri k'ij,

¹⁷ lal xcojow la ri u c'ulbatil ri uwächulew, lal xbanow la ri sak'ij xukuje' ri k'aläj.

¹⁸ Mel pa jolom la, Ajawaxel, chi ri c'ulel cäyok'on che la, xukuje' tak winak ri man e c'o ta qui no'j queyok'on che la.

¹⁹ ¡Sibalaj mujsach pa jolom la! Uj tuka'r uj jacha' ri palomax; ¡mujjach la pa qui chi' ri juyubal tak awaj!

²⁰ ¡Chnataj ri c'ulwächinic la che la, nojinak c'u ri ulew che tokinic, c'ä pa ri q'uisbal jutz'!

²¹ Mäya' la c'olbal chi camach'irisax ri c'axc'obinak; ¡chbana' la chi cäya' k'ij la rumal ri meba' xukuje' rumal ri man nim ta u k'ij!

²² ¡Walij la, nu Dios! ¡To' ib la che ri caban che la! ¡Nataj che la chi ri man etal ta tzij man caquitanaba' ta yok'ic la!

²³ Mäsach pa jolom la ri rakoj tak qui chi' ri e c'ulel la, ri nimalaj qui wojcorem ri man cacaj ta ch'abexic.