Salmib 71 - Quiché Bible

U ch'awem jun nim winak ruc' ri Dios

¹ Ajawaxel, uc' la quintzucuj wi u to'ic wib; ¡mawi jubik' mesaj la nu q'uixbal!

² ¡Chinesaj la pa ri c'ax, chincolo' la, sibalaj c'u lal suc'! Choc la il che nu to'ic, chincolo' c'u la.

³ Chux la jun nimalaj abaj chwe ri quinch'uk wi wib, chux la to'bal wib re panibal xukuje' colobal ib. Lal ri' ri lal nimalaj abaj chwe xukuje' to'bal wib.

⁴ Nu Dios, chinesaj la pa u k'ab ri banal etzelal; chinesaj la pa u k'ab ri banal il xukuje' tokinel,

⁵ ri lal c'ut Ajawaxel, pa ri nu ch'utinal ulok lal cu'lbal nu c'u'x xukuje' ri u cowiribal ri wanima'.

⁶ C'ä in c'o pa ri u c'u'x ri nu nan aretak nu cuban chi nu c'u'x chij la; lal xabanow la chi xinalaxic amak'el quinya' na k'ij la.

⁷ In uxinak mayibal chque q'ui winak, lal c'ut ri nu panibal.

⁸ Ronojel k'ij nojinak ri nu chi' che u bixoxic ri juluwem la;

⁹ metzelaj la nu wäch aretak in nim winak chic; minya' la canok aretak man c'o ta chic nu chuk'ab.

¹⁰ Ri e nu c'ulel, ri cäcaj quinquicämisaj, qui junamam qui tzij cäquichomaj nu cämisaxic.

¹¹ Cäquibij: “¡Chiterenej pa rakan, chichapa', xutum c'u can rumal ri Dios, man c'o ta c'u jachin craj cuto'!”

¹² Mänajtin la chwe, nu Dios; saj la chanim che nu to'ic,

¹³ ¡chesax qui q'uixbal xukuje' chisachisax qui wäch ri cäquiban qui c'ulel che ri nu c'aslemal! ¡Chtze'x qui wäch ri cäcaj ri nu c'axc'olil!

¹⁴ Are c'u ri in quineyen pa ronojel jok'otaj, xa c'u sibalaj quintakej na k'ijilaxic la;

¹⁵ ronojel ri jun k'ij quintzijoj cuc' ri nu chi', chi lal lal uj colowinak banom c'u la suq'uilal chke. ¡Jun jasach wa' ri man quinrik ta u ch'obic!

¹⁶ Ajawaxel, quintzijoj na ri nimak tak jastak ri banom la; quinwesaj na u tzijol chi xuwi ri lal lal suc'.

¹⁷ Nu Dios, lal xintijon la pa ri wac'alal, nu takem c'u ne' qui ya'ic qui tzijoxic tak ri e nimak tak chac la.

¹⁸ Nu Dios, minwonoba' la canok, aretak in nim winak chic sak chic ri nu wi'. Quintakej c'u na u tzijoxic ri cuinem la chque we winak ri' ri e c'o camic xukuje' ri c'amaja' quebalaxic.

¹⁹ Ri suq'uil la, nu Dios, copan c'ä chicaj; ri lal e banom la nimak tak jastak; ¡man c'o ta chi jun ri junam ta uc' la!

²⁰ Pune' banom la chwe chi e wilom e q'ui c'axc'olil xukuje' rikoj tak c'ax, banom la chwe chi in c'aslic; quinwalijisaj c'u na la chuxe' ri u najil ri u pam ri ulew,

²¹ cänimatajisaj c'u na la ri nu nimalil cäcu'bisaj chi c'u na la ri nu c'u'x.

²² Are' c'u ri in, pa we wi, quebenbixoj na bix quink'ijilaj na ri nimalil la, ruc' ri rok'ibal ri arp xukuje' ri re ri nimalaj arp, nu Dios, tastalic pa Israel.

²³ Ri e nu chi' quequicotic aretak quinbixon che la, ri in c'ut, in to'tajisam la,

²⁴ xukuje' ri wak' man cutanaba' ta u bixic chi ri lal, lal suc', e are' tak c'ut ri cäcaj chi quinrik c'ax elinak nimalaj qui q'uixbal.