Salmib 7 - Quiché Bible

Ri Ajawaxel jun suc'alaj k'atal tzij

¹ Ajawaxel, nu Dios, uc' la quintzucuj wi u ch'ukic wib; ¡Chinto'tajisaj la chinesaj la pa qui k'ab ri cäcaj caquiban c'ax chwe!

² ¡Chinesaj la chquiwäch, e jacha' c'u ne' coj; minquit'ubij c'u ne' ma ta c'u ne' c'o jachin quinto'tajisanic!

³ Ajawaxel, nu Dios, ¿Jachin chque we jastak ri' in tzaknak wi? ¿La xa ta pa u lo nu banom jun mac che jun?

⁴ ¿La xa nu yo'm itzel rajil c'axelal che ri u banom utzilal chwe? ¿La xa pu xak lok' nu banom c'ax che ri u banom u c'ulel chwe?

⁵ We jewa' nu banom, chubana' c'ax ri u banom u c'ulel chwe; chinkaj pa u k'ab, chinuchararej cho ri ulew, chinuya' pa yok'ic pune' nim nu k'ij.

⁶ Ajawaxel, ¡walij la ruc' c'anal! ¡K'atij la u wäch ri coyowal ri qui banom qui c'ulel chwe! Lal yo'm la u bixic chi cäban la suc'alaj k'atoj tzij, ¡to' ba la nu wi'!

⁷ Chquimulij tak quib ri e aj nimak tak tinimit uc' la cojo' la ri tem re ajawibal la chicaj, chajawin c'u la paquiwi'.

⁸ Ajawaxel, lal cäk'at la tzij paquiwi' ri nimak tak tinimit: k'ata' la tzij panuwi' jacha' chi in tz'akat pa ronojel; k'ata' la tzij panuwi' jacha' chi man c'o ta nu mac.

⁹ Suc'alaj Dios, ri quebe nic'oj la tak ri chomanic xukuje' ri c'o pa ri animaaj ri e c'u'talic, ¡sacha' la u wäch ri quetzelal ri e banal tak etzelal, co c'u tac'aba' la ri winak ri tz'akat pa ronojel!

¹⁰ Ri ch'ukubal wib are' ri Dios ri aj chicaj, ri quebuto'tajisaj ri jicom ri canima'.

¹¹ Ri Dios are' jun suc'alaj k'atal tzij ri cuc'okoj ri etzelal pa ronojel k'ijol.

¹² We ri winak man cätzelej ta ruc' ri Dios, ri Dios cuban u ware ri u ch'ich' re ch'o'j; u tanim chic ri u q'uiakbal ch'ab,

¹³ cuchaplej u q'uiakic tak ri u ch'ab ri quenicowic, ¡e suc'umatal chic ri e u ch'ojibal ri quecämisanic!

¹⁴ Chiwilampe' ri banal etzelal: c'o k'oxom re alc'ualanic che, yawab winak chic che ralc'ualaxic etzelal, caralc'ualaj c'u banoj tzij.

¹⁵ U c'otom jun jul ri sibalaj naj kajinak, chupam c'ut ri u jul cätzak wi na.

¹⁶ ¡Ri retzelal xukuje' ri u ch'ujilal quekaj na puwi' ri u jolom!

¹⁷ Quink'ijilan che ri Ajawaxel, suc' c'ut ri are'; quebenbixoj bix che ri u bi' ri Ajawaxel, che ri u bi' ri aj chicaj.