Salmib 69 - Quiché Bible

Jun rakoj chi'aj rech q'uistajibal c'uxaj

¹ Chincolo' la, nu Dios, jik'em quinbano;

² cätajin quinbik'taj chupam jun suk ri cäbik'onic man c'o ta c'u quebentac'aba' wi ri wakan. In kajinak bic c'ä chuxe' ri ja' quinucharchatej bic ri u tza'm ja'.

³ Xak catarin chic ri nu kul cumal rakoj tak chi'aj; cäk'oxow chi ri u pa nu kul; ¡e k'itajinak chic ri nu bak'wäch che ri sibalaj reyexic ri nu Dios!

⁴ Ri man c'o ta rumal caquetzelaj nu wäch e c'o na ri qui q'uiyal chuwäch ri wi'aj ri e c'o che ri nu jolom; e q'uiyirinak ri qui banom qui c'ulel chwe ri man c'o ta jasche caquisachisaj nu wäch caquicoj c'u qui chuk'ab chwe chiquintzelej ri man welek'am taj.

⁵ Nu Dios, lal eta'm la chi sibalaj man in nimaninak taj; man quincuin ta quebenc'u' ri nu mac chwäch la.

⁶ Ajawaxel, Dios ri c'o ronojel u cuinem, ¡mesax qui q'uixbal rumal ri nu chak'maquil ri caquicu'ba' qui c'u'x chij la! U Dios ri Israel, ¡mäq'uistaj qui c'u'x u mac wech ri ruc' ronojel canima' quetzucun che la!

⁷ Rumal ech la e nu ch'ijom c'axc'ol; xnoj ri nu palaj che q'uixbal;

⁸ ¡je ta ne ri naj ta quinpe wi ri ma ta etamatal nu wäch cumal ri kas e wachalal!

⁹ Quincäm che achixomanic che rilixic ri achoch la; in in kajbeninak ronojel ri qui yok'bal ri quebanow c'ax che la;

¹⁰ aretak quinok'ic xukuje' man quinwa ta c'ut, caquitze'j nu wäch;

¹¹ we quincoj atz'iak re bis, conojel cäquitze'j nu wäch.

¹² Quinch'ach'axic, e are' tak c'ut ri k'abarelab quinquesaj pa ri qui bix.

¹³ Are c'u ri in, Ajawaxel, quintz'onoj to'banic che la; ¡Nu Dios, chinto' la camic! ¡Rumal ri nimalaj lok'ok'ebal c'u'x la, chinch'abej la ulok! ¡Rumal ri to'banic la amak'el, chincolo' la!

¹⁴ Mäya' la be chi quinbik'taj bic chupam ri xok'ol, chinesaj la pa qui k'ab ri cäquetzelaj nu wäch xukuje' pa ri choalaj tak ja',

¹⁵ ¡mintzokopij la minujic' c'u bic ri ja'! Chk'atij la ri nimalaj sulc'um rech man quinubik' ta mawi chinumuk ta can chupam.

¹⁶ Ajawaxel, chinch'abej la ulok; ¡ri lal, lal utz! xukuje' ¡lal nojinak che lok'ok'ebal c'u'x! Rumal ri nimalaj ch'uch'ujil la, chinila' la ulok;

¹⁷ ¡maxutuj la we pataninel ech la ri'! ¡Chinch'abej la ulok aninak xak c'u quieb cubij panuwi' camic!

¹⁸ K'eb la ulok wuc', chincolo' la; ¡chinesaj la pa qui k'ab ri e nu c'ulel!

¹⁹ Chwäch la c'o wi ri c'ax ri nu rikom, ri q'uixbal xukuje' ri yok'obal; eta'm la jachin tak ri e nu c'ulel.

²⁰ Ri yok'obal qui t'okopim ri wanima', ¡in chukchubinak chic man c'o ta chi nu chuk'ab! Xak lok' nu tzucum jachin ta ri cucu'bisaj nu c'u'x xukuje' quel ta u c'u'x chwe.

²¹ Xquiya' c'u cämisabal chupam ri nu wa, aretak xchaki'j nu chi' xquiya' ch'amalaj ja' chwe.

²² ¡Ri qui wa re nimak'ij puwi' ri qui mexa chux jun c'amibal chque!

²³ ¡Chemoyirisaj la chcoycot ri cakan amak'el!

²⁴ Chkaj ri oyowal la paquiwi'; ¡ri c'anal la ri nicowinak chebukajbej!

²⁵ Ri u kajebal chwonobax canok, ma ta c'u c'o jun chjeki' pa tak ri e u lic'om cäbal;

²⁶ caquitakej c'u u banic c'ax che ri c'axc'obisam la cäquitze'j c'u u wäch ri u k'oxomal ri socom la.

²⁷ Je tojbal quech chya' la jas ri c'ax ri qui banom; ¡mäquirik ri sachbal qui mac!

²⁸ ¡Chechupu' la ri qui bi' chupam ri wuj re c'aslemal! Mätz'ibaj la ri qui bi' chquixo'l ri e suc'.

²⁹ Are' c'u ri in, yawab xukuje' in c'axc'obinak, chinwalijisaj la, nu Dios, chincolo' la.

³⁰ Quinya' na u k'ij ri u bi' ri Dios cuc' tak bix; quinya' na u k'ij ruc' maltioxinic,

³¹ sibalaj c'u cäkaj na wa' chuwäch ri Ajawaxel che u q'uexwäch we ta quinchi'j jun ama' wacax che tabal tok'ob o jun alaj ama' wacax ri querachilaj tak ri ruc'a' xukuje' tak ri rixq'uiak.

³² Aretak caquil wa' quequicot na ri e c'axc'obinak cuchajij na anima' ri canima' ri caquitzucuj ri Dios;

³³ ri Ajawaxel quebutatabej na ri mebayib mawi cäretzelaj qui wäch ri e rech ri e c'o pa che'.

³⁴ ¡Ri caj chk'ijilan che ri Ajawaxel, ri ulew xukuje' ri plo, xukuje' conojel tak ri c'asc'oj ri e c'o tak chquipam!

^35-36 Ri Dios cuto'tajisaj na ri Sion cubana' chi na qui banic ri e u tinimit tak ri Juda. Ri e calc'ual ri e pataninel tak rech quebechben na ri tinimit; chila' quejujayir wi na, cacanaj che quechbal; ri quelok'ok'en ri u bi' e are' ri quejeki' na chupam.