Salmib 68 - Quiché Bible

Ri u binem ri tinimit Israel re ch'äcanic

¹ Aretak ri Dios cucoj ri u cuinem, ri e u c'ulel cäquijabuj quib; ri cäquetzelaj u wäch quebanimaj chuwäch;

² quesach pa ri quiakik' jacha' ri sib, queleblobic jacha' ri xca'b pa ri k'ak'; chuwäch ri Dios, man c'o ta qui k'ij ri e banal tak etzelal.

³ E are' c'u ri e utzalaj tak winak quequicot na; quenoj che quicotemal chuwäch ri Dios, ¡quech'opin rumal quicotemal!

⁴ Chixbixon ix che ri Dios, chebibixoj bix che ri u bi'; chiya' u k'ij ri cäquiejen paquiwi' tak ri sutz'. ¡Chixquicot ruc' ri Ajawaxel! ¡Chixquicot chuwäch!

⁵ Ri Dios, ri jekel pa ri tastalicalaj rachoch, are' qui tat ri minorib xukuje' are' to'l quech ri malca'nib;

⁶ ri Dios cuya' qui c'olbal ri man c'o ta quec'oji' wi, ri e c'o pa che' quebutoro, quebuya' pa utzil; are c'u ri man queniman taj quec'oji' na pa pojpic tak ulew.

⁷ Nu Dios, aretak xnabej la chuwäch ri tinimit la, xbinisaj c'u la ulok pa ri chaki'j uwo sak,

⁸ ri ulew xyicopic; xpe jäb chicaj, ri Sinai xyicop chuwäch ri u Dios ri Israel.

⁹ Nu Dios, xekasaj la nimak tak jäb che u ya'ic c'ac' u chuk'ab ri ulew ri chaki'jarinak.

¹⁰ Xjeki' c'u ri tinimit la chila', are' c'u ri lal nu Dios, rumal ri utzil la, xya' la che ri meba' ri cajwataj che.

¹¹ Ri Ajawaxel xuya' jun c'ac' tzijol; e q'ui ixokib xquiya' u bixic:

¹² “¡Cätajin quebanimaj tak ri ajawinelab cachil ri e cajch'ojab!” Ri ixokib cho tak ri cachoch, cätajin cäquijach ri xtokix chque ri c'ulel,

¹³ ri ix c'ut xebe i c'u' can tak iwib. ¡Qui xic' tak palomax ri e ch'ukutal quij ruc' sak puak! Ri e quismal e ch'ukutal quij ruc' utzalaj k'an puak.

¹⁴ Aretak ri c'o ronojel u cuinem xerokataj bic ri ajawinelab, kajinak tew puwi' ri juyub Salmon.

¹⁵ Ri juyub re Basan sibalaj e nimak tak juyub. Sibalaj naj e elinak ri qui wi' chicaj.

¹⁶ Ix, ri sibalaj ix tac'atak tak juyub, ¿Jasche c'ax quina' chrij ri juyub ri xraj ri Dios xjeki' wi? ¡Ri Ajawaxel chila' cäjeki' wi na chbe k'ij sak!

¹⁷ Ri Dios querajilaj pa tak miyon (1,000,000) ri e u carwaj re ch'o'j; pa ri Sinai xel wi ulok, xopan pa ri rachoch.

¹⁸ Nu Dios, xpaki' la chicaj xec'am tak la bic e alabim; xc'am la tojbal chquixo'l ri winak xukuje' ne' ri man e tal ta tzij xequijach tak quib pa k'ab la, Ajawaxel.

¹⁹ ¡Tewichital ri Ajawaxel, ri ka Dios xukuje' ka colonel, k'ij chi k'ij cuc'am bic ri keka'n!

²⁰ Ri ka Dios, are jun Dios ri cäcolonic, ri xukuje' cäcuinic cujresaj pa u k'ab ri cämical.

²¹ Ri Dios cupaxij na ri qui jolom ri e u c'ulel, xukuje' ri e qui jolom ri cäquitakej u banic ri mac.

²² Ri Ajawaxel u bim: “Quinban na chawe chi cattzelej ulok caya' can ri Basan; quinban na chawe chi cattzelej ulok caya' can ri choalaj plo,

²³ rech quebamu' ri awakan pa ri qui quiq'uel ri e a c'ulel cäquirik' c'u na ri e a tz'i'.”

²⁴ Dios, nu Dios, Ajawinel, chupam ri ja ri cak'ijilax wi la queilitaj wi ri tinimit winak quek'atatic, quek'atat che u ya'ic k'ij la.

²⁵ Ri ajbixab e nabejinak e teren chi bic ri ajk'ojomab, pa u niq'uiajil e benak wi ri alaj tak alitomab cätajin cäquichinicha' chinchin.

²⁶ ¡Chitewichi'j iwonojel ix ri Dios ri Ajawaxel! ¡Chtewichi'x rumal ronojel israel ri u mulin rib!

²⁷ Chquiwäch e are' benak ri Benjamin, ri chak'axel, achilatal cumal e q'ui c'amal tak be re Juda, e rachil c'amal tak be re Zabulon xukuje' re Neptali.

²⁸ Nu Dios, c'utu' la ri cuinem la; ¡jiquiba' chi la u banic ri banom la chke!

²⁹ Kas chupam ri jutac'ajalaj achoch la ri c'o pa Jerusalen, ri quebopan wi tak ri ajawinelab cuc'am tak sipanic che la,

³⁰ chk'ila' la ri Ejipt, we awaj ri' ri aj xic'ay, ri juk'at c'analaj ama'ib tak wacax xukuje' alaj ama'ib tak wacax ri rumal ri qui rayixic tak k'inomal cäquikasaj qui k'ij tak ri tinimit; che jabuj la ri winak ri cäkaj ri ch'o'j chquiwäch.

³¹ Pa Ejipt quepe wi na ri chaconisan tak re k'an ch'ich'; ri Etiopiy cuyac na ri u k'ab chuwäch ri Dios.

³² ¡Chixbixon che ri Dios, ajawibal tak rech ri uwächulew; chebibixoj bix che ri Ajawaxel,

³³ ri quiejeninak puwi' ri caj, ri junalic caj! Chitampe' ri u xojlinem ri u ch'abal, ri ch'abal ri c'o u cuinem.

³⁴ Chiquiya' u k'ij ri u cuinem ri Dios; ri nimalaj u bantajic u lic'om rib puwi' ri Israel, ri u cuinem cunak ri räxalaj caj.

³⁵ Mayibal ri Dios chupam ri cak'ijilax wi; ri u Dios ri Israel cuya' cuinem xukuje' u chuk'ab che ri u tinimit. ¡Tewichital ba' ri Dios!