Salmib 66 - Quiché Bible

Ri e banoj la e mayibal

¹ Chixbixon che ri Dios ruc' quicotemal, iwonojel ri ix jekel cho ri uwächulew;

² chebibixoj bix che ri u bi' ri nim u k'ij; chebibixoj je'lalaj tak bix che;

³ chibij che ri Dios: “Ri jastak ri e banoj la e mayibal. Rumal ri nimalaj cuinem la ri e c'ulel la quixe'n quib quetzak na chwäch la;

⁴ conojel ri winak cho ri uwächulew quek'ijilan che la, cäquibixoj bix che ri bi' la.”

⁵ Tisaj che rilic ri e u banoj ri Dios, ri mayibal ri e u banom chquiwäch ri winak:

⁶ Xuq'uex ri plo pa chaki'j ulew, ri e ka mam xeboc'ow chupam ri nima' chicakan; ¡chujquicot pa ri Dios!

⁷ Ruc' ri u cuinem cuk'at tzij chbe k'ij sak; ri u bak'wäch quebuyuxlej ri nimak tak tinimit rech ri man caraj ta ch'abexic man caquiwalijisaj ta quib chrij.

⁸ ¡Nimak tak tinimit, chixtewichi'n che ri ka Dios! ¡Chibana' chi quexojlin tak ri e i bix re k'ijilanic!

⁹ Rumal rech chi u yo'm ka c'aslemal; man u yo'm ta chke chi cujtzakic.

¹⁰ Nu Dios, uj tijtobem la, ¡uj josk'im la jacha' ri cäban che ri sak puak!

¹¹ Banom la chke chi uj kajinak chupam jun c'at; xkasaj la nimalaj bis pakawi';

¹² xya' la be che jun ri man k'alaj ta u wäch xujutac'alej; uj oc'owinak chupam ja' xukuje' chupam k'ak', xya' chi c'u na la ka c'aslemal.

¹³ Quinoc na chupam ri achoch la, quebenporoj na sipanic chwäch la; je quinban wa' che qui tz'akatisaxic tak ri nu chi'nic,

¹⁴ ri chi'nic tak ri xebenban che la aretak xinc'oji' chupam ri xak quieb xubij panuwi'.

¹⁵ Quebenporoj na k'obisam tak awaj puwi' ri porobal ri ech la, quebenchi'j tak na ama'ib tak wacax xukuje' ama'ib tak q'uisic' xukuje' ri qui c'oc'al ama'ib tak chij.

¹⁶ ¡Tisaj iwonojel ix ri quixe'j iwib chuwäch ri Dios! ¡chitampe' quintzijoj chiwe ri u banom ri Dios wuc'!

¹⁷ Cuc' ri nu chi' xukuje' ri wak' xinsiq'uij, xink'ijilan c'u che.

¹⁸ We ta e c'o itzel tak nu chomanic ma ta xinutatabej ri' ri Ajawaxel;

¹⁹ xinutatabej c'ut, xoc il che ri nu ch'awem.

²⁰ ¡Chyo'k u k'ij ri Dios, ri man xuxutuj ta ri nu ch'awem mawi xuk'il ri nu lok'ok'exic! cumal conojel tak ri tinimit