Salmib 65 - Quiché Bible

Ri Dios ya'tal u k'ijilaxic

¹ Nimalaj Dios re Sion, ¡lal ya'tal ri k'ijilaxic la! ¡Ya'tal che la chi quetz'akatisax ri quechi'x che la,

² cätatabej c'u la ri ch'awem ri cäban che la! Conojel ri winak quepe na che tzucuxic la.

³ Ri ketzelal, uj qui kajbem, ri lal c'ut quesach la ri e ka mac.

⁴ Utz re ri winak ri cächa' la ri cäc'am c'u la bic rech cäjeki' chnakaj la, pa tak ri c'olbal ri e c'o pa ri achoch la. ¡Chujnojisaj la che ri utz na ri c'o pa ri achoch la, che ri u tastaliquil ri achoch la!

⁵ Dios xukuje' ka colonel, ri lal cätzelej la u wäch ri ka tzij cuc' mayibalalaj tak banoj re suq'uil; ronojel ri uwächulew cucu'ba' u c'u'x chij la, xukuje' ne ri plo ri naj c'o wi;

⁶ ri lal co e jekebam tak la ri juyub ruc' ri cuinem la xukuje' ruc' ri chuk'ab la.

⁷ Lal cajamarisan la ri u wululem ri plo xukuje' ri qui ch'ujilal tak ri tinimit;

⁸ xukuje' ne ri e c'o pa naj tak ulew quebirbob na chquiwäch tak ri e mayibal la; rumal ech la c'o rakoj chi'aj re quicotemal pa elebal k'ij c'ä che u kajebal k'ij.

⁹ Ri lal coc la il che u chajixic ri ulew; cätak la ulok ri jäb che u ja'xic xukuje' cäban c'u la chi cäwächinic; lal cumal nimak tak jäb cäban la chi queq'uiy tak ri trico. ¡Jewa' cäban la che u suc'umaxic ri ulew!

¹⁰ Quech'akaba' la tak ri k'et rech ri ulew, quenojisaj la tak ri u xo'l che ja'; quech'uch'ujirisaj la cumal nimak tak jäb quetewichi'j c'u la ri e qui wächinic.

¹¹ Cänojisaj la ri junab cuc' tak tewichibal, ri sutz' la cäquijamij ulok nimak tak jäb;

¹² ri k'ayes pa tak ri chaki'j uwo sak queräxaric ri juyub tak cäc'ac'ar ri qui wiktajic;

¹³ ri lianic quech'ukutaj cumal tak jumulaj, ri beya' tak queliow che trico; ¡conojel quebixonic cäquirak qui chi' re quicotemal!