Salmib 64 - Quiché Bible

Ch'awem che u tz'onoxic ri ch'ukubal ruc' ri Dios

¹ Nu Dios, tatabej la ri nu ch'ach'atem; ch'uku' la ri nu c'aslemal makaj pa qui k'ab ri xibibalalaj tak c'ulel.

² Chinc'u' la chquiwäch ri banal tak etzelal xukuje' chuwäch ri subunic ri man e k'alaj taj; chinesaj la chuwäch ri qui chomam qui banic ri e banal tak etzelal,

³ ri cäquiban u pa u chi' ri cak' jacha' ch'ich' ri ch'o'j ri quequiq'uiak tak tzij e jacha' ta ne' ch'ab ri quecämisanic.

⁴ Pa ri c'ubal quib quequiq'uiak ulok ch'ab chque ri man c'o ta qui mac; man caquixe'j ta quib xak c'äte queq'uiakan ulok.

⁵ Cäquiyala' qui no'j chbil tak quib che u banic ri man utz taj; cäquichomaj u c'ojic c'amibal chc'uyal are pa qui c'u'x chi man c'o ta jun queilowic,

⁶ chi man c'o ta jun cäch'obow ri quetzelal. Are' c'u ri cäcuin che retamaxic ri qui chomanic ri winak ri c'o pa canima', are' cäch'obow na.

⁷ Quesoc na rumal ri Dios ruc' ri u ch'ab, man c'o ta cäquinabej aretak quesoc na;

⁸ quetzak na rumal tak ri qui tzij, cätze'x na qui wäch cumal ri queilowic.

⁹ Conojel c'ut cäquiya' na u k'ij ri Dios cäquitzijoj na ri jastak ri e u banom; cäquich'ob na ri u banom ri Dios.

¹⁰ Ri utzalaj winak cäquicot na pa ri Ajawaxel cutzucuj c'u na u ch'ukic rib ruc' are', conojel c'u ri winak ri e tz'akat pa ronojel caquina' na quib chi e nojinak.