Salmib 63 - Quiché Bible

Ri Dios are cu'lbal u c'u'x ri winak

¹ ¡Nu Dios, lal ri lal nu Dios! Ruc' nimalaj rayinic quintzucun che la, cächaki'j nu chi' che la; ruc' ronojel wanima' quinrayin che la, in junam ruc' ri chaki'j ulew ri man c'o ta wi ja', mawi c'aslemal.

² ¡Quinwaj quinwil wäch la chupam ri cak'ilax wi la quinwil c'ut ri cuinem la xukuje' ri juluwem la!,

³ ¡are c'u utz na ri lok'ok'ebal c'u'x la chuwäch ri c'aslemal! Ruc' ri nu chi' quinya' na k'ij la;

⁴ pa ronojel nu c'aslemal quinya' na k'ij la, quinyac ri nu k'ab chwäch la aretak quinch'aw uc' la.

⁵ Kas c'u quinnoj canok, jacha' ri cutij ronojel ri ulabal ri sibalaj je'lic, e are tak c'ut ri nu chi' quek'ijilan na che la ruc' quicotemal.

⁶ Chak'ab tak, aretak in k'oyol chic, cänataj la chwe quinchoman c'u che la;

⁷ lal c'ut ri quinto'w la. Quinquicot chquixe' ri xic' la.

⁸ Ronojel ri nu c'aslemal u nuc'um rib che la; ri iquiak'ab la man quinutzokopij taj.

⁹ Ri cäquitzucuj nu cämisaxic quetzak na chupam ri mukubal;

¹⁰ ¡quecäm na pa u chi' ch'ich' re ch'o'j quet'ubix c'u na cumal tak utiw!

¹¹ Are' c'ut ri ajawinel cäquicot na ruc' ri Dios; quebequibixoj na bix conojel ri cäquiban ri chi'nic ri kas cäban na pa ri u bi', e are' tak c'ut ri quebanow tak tzij catz'apilox na ri u pa qui chi'.