Salmib 62 - Quiché Bible

Ri Dios, xuwi ri are' panibal

¹ Xuwi ruc' ri Dios quinrik wi jamaril; ruc' are' cäpe wi ri nu colotajic.

² Xuwi ri are' quincolowic xukuje' qui nu ch'uku'; man quintzak taj, che c'u quinchap wi wib.

³ ¿C'ä jampa' lo qui tanaba' u chomaxic u banic c'ax chwe quinit'akij ta pa ulew jacha' jun tapia ri xak pachal chic o jun ja ri xa co'l man cätzakic?

⁴ Xuwi quichomaj nu t'akixic; ri i quicotemal are ri banoj tzij: ruc' ri i chi' quiya' nu k'ij quiniyok' c'u pa tak iwanima'.

⁵ Xuwi ruc' ri Dios quinrik wi jamaril; ri cu'lbal nu c'u'x ruc' are' cäpe wi.

⁶ Xuwi ri are' quincolowic xukuje' qui nu ch'uku'; man quintzak taj, che c'u nu ch'apom wi wib.

⁷ Pa u k'ab ri Dios c'o wi ri nu colotajic xukuje' ri u nimarisaxic nu k'ij; are' ch'ukul wech, xukuje' nu panibal.

⁸ ¡Nu tinimit, chacu'ba' a c'u'x chrij ri Dios! chixch'aw ruc', ruc' ronojel jiquibam c'uxaj. ¡Ri Dios are' ka panibal!

⁹ Ri winak xa jun uxlab, xak junam ri meba' ruc' ri k'inom; we ta quepaj junam pa jun pajbal, man quepajan ta jubik'.

¹⁰ Micu'ba' i c'u'x chrij ri tokinic; ¡mawi misipojisaj iwib rumal ri eläk'! We quixk'inomaric, micu'ba' i c'u'x chrij ri puak.

^11-12 Man xa ta jumul o camul nu tom wa' ri u bim ri Dios: chi ri cuinem xukuje' ri lok'ok'ebal c'uxaj, e rech, ri are' c'ut quetojow chquijujunal jas ri u cholajil ri u banom.