Salmib 60 - Quiché Bible

Ch'awem ruc' Dios che u tz'onoxic ri u to'banic

¹ Chupam ri oyowal la, nu Dios uj wonobam la canok, uj c'äjim la; ¡tzelej ba la camic ri ka chuk'ab!

² Xban la chi xyicop ri uwächulew, xujak c'u rib; camic c'ut, chetz'apij la ri e u tetobic cätajin c'u cäwulwubic.

³ Oc'owisam ri tinimit la pa nimak tak c'axc'olil; yo'm la jun u wa'l uva chke pa tijic ri cäch'ujirisanic;

⁴ ¡ya' la jun etal camic chque ri caquina' quib chwäch la rech man queriktaj ta cumal tak ri ch'ab!

⁵ ¡Choc la il chke, chujcolo' la ruc' ri chuk'ab la! ¡Ri e lok' chwäch la chebesaj la pa ri c'ax!

⁶ Ri Dios u bim chupam ri cak'ijilax wi. “¡Ruc' nimalaj quicotemal quinjacha' u wäch ri Siquem quinjach c'u na ri beya' re Sucot!

⁷ Ri Galaad xukuje' ri Manases e wech; ri Eprain are to'bal nu jolom; ri Juda are nu ch'ämiy re takanic;

⁸ ri Moab are tzima ri quinch'abej wib; puwi' ri Edom quinq'uiak wi na ri nu xajäb; ¡quinrak c'u nu chi' rumal ri ch'äcanic paquiwi' ri aj pilisteyib!”

⁹ Nu Dios, ¿Jachin ta quinc'amow bic pa ri tinimit ri c'o nimalaj tapia chrij? ¿Jachin ta quinc'amow bic c'ä pa Edom?

¹⁰ Are c'u ri lal, nu Dios, uj xutum la canok; ¡man cäbe ta chi la cuc' ri kajch'ojab!

¹¹ Chujto' ba la che qui ch'äquic ri e ka c'ulel, man c'o ta c'u u patan ri u to'banic ri winak.

¹² Ruc' ri u to'banic ri Dios quekaban na nimak tak jastak; ¡ri are' quebutac'alej na ri e ka c'ulel chquikul!