Salmib 6 - Quiché Bible

Ch'awem ruc' Dios pa tak ri rikoj c'ax

¹ Ajawaxel, minyaj la pa ri oyowal la, mac'äjisaj la nu wäch pa ri c'anal la.

² Ajawaxel, chel c'u'x la chwe, quinna' wib chi man c'o ta nu chuk'ab. Ajawaxel, tzelej la ri rutzil nu wäch, ronojel c'u ri nu cuerp cäbirbitic.

³ ¡Cätajin quinbirbit rumal xe'n ib! E c'u ri lal Ajawaxel, ¿jampa' cäpe la?

⁴ Saj la Ajawaxel; chto'tajisaj la ri nu c'aslemal, chinto'tajisaj la rumal ri lok'ok'ebal c'u'x la.

⁵ Man c'o ta jun ri cäminak cacuinic cänataj ta la che: ¿jachin ta ri cacuinic cäyo'w ta k'ijilanic che la chupam ri mukubal?

⁶ In cosinak che ok'ej. Jujun tak ak'ab quinq'uis wib che ok'ej cäch'aki' ri nu ch'acat cumal ri u wa'l nu wäch.

⁷ Ri k'oxomal cusutz'irisaj ri nu bak'wäch; ¡que sutz'ar u mac quech ri qui banom qui c'ulel chwe!

⁸ ¡Chitasa' iwib chwij, banal tak etzelal, opaninak c'u ri wok'ej chuwäch ri Ajawaxel!

⁹ Ri Ajawaxel xebutatabej ri e nu bochi'nic, ¡are' ri Ajawaxel xec'amowan ri e nu ch'awem ruc'!

¹⁰ Ri qui banom qui c'ulel chwe e cäminak rumal xe'n ib, quecanaj pa moxil; ¡pa jun u jakic xukuje' u tz'apixic bak'wächaj quebanimaj na elinak qui q'uixbal!