Salmib 58 - Quiché Bible

U tz'onoxic ri suq'uilal

¹ Ix ri e c'o i chuk'ab, ¿la kas suc' ri k'atan tzij ri quibano? xukuje' ¿la quiban kas k'atan tzij?

² Xane' etzelal ri quibano; quijak ri be che ri tokinic chupam ri uwächulew.

³ Ri e banal tak etzelal cäquetzelaj ulok quib pa ri u c'u'x ri qui nan; ri e banal tak tzij cäquijech'obisaj ulok quib c'ä majok quebalaxic.

⁴ Quecämisanic e jacha' ri sachoj; e junam ruc' jun cumätz ri cäcämisanic ri cuban rib chi man cätan taj, ri quebutz'apij ri e u xiquin

⁵ rech man cuta' ta ri k'ojomanic ri cuban ri ajk'ij, ri cuban ri cäna'w che subunic.

⁶ Nu Dios, ¡chek'ajisaj la ri e qui ware! Ajawaxel, ¡chek'ajisaj la ri e u tz'i' ri qui ware we coj ri'!

⁷ Sacha' la qui wäch jacha' ri ja' ri cäbinic, chechaki'jarok jacha' ri k'ayes pa tak ri be;

⁸ chejarok jacha' ri t'ot' ri cäjar pa ri u c'axaj, ¡jacha' ri ac'al ri man xtz'akat ta u k'ij ri mawi jumul xril ri sakil!

⁹ Chenicowok e jacha' ri q'uix c'ä mäjok c'o chnabexok; chebok ruc' oyowal, jacha' ri räx k'ayes.

¹⁰ Ri jic cäquicotic aretak cärilo cäc'äjisax u wäch ri u c'ulel; quebumu' na ri rakan chupam ri u quiq'uel ri banal etzelal.

¹¹ Cubij c'u na chbil rib: “¡C'o ba' rumal cux jic jun winak! ¡C'o jun Dios ri cuk'at tzij puwi' ri uwächulew!”