Salmib 57 - Quiché Bible

Ch'awem ruc' Dios che u tz'onoxic ri u to'banic

¹ Chel c'u'x la chwe, nu Dios, chel c'u'x la chwe, uc' la quintzucuj wi u to'ic wib. Quinwaj quinto' wib chquixe' ri xic' la c'ä coc'ow na ri xak quieb cubij panuwi'.

² Quinsiq'uij apan ri Dios ri c'o chicaj, ri Dios ri quinuto' pa ronojel.

³ Cutak na ulok kas pa ri caj ri u lok'ok'ebal u c'u'x xukuje' ri u kastzij, quinresaj c'u na pa qui k'ab ri cäquiban c'ax chwe ruc' ch'ujilal.

⁴ In liq'uin, cho ri ulew, chquixo'l tak coj ri e tijol tak winak; ri qui ware junam cuc' ri tz'imaj ch'ich' xukuje' tak ri ch'ab, ri cak' junam ruc' jun ch'ich' re ch'o'j ri banom u pa u chi'.

⁵ Nu Dios, lal c'o puwi' ri caj. ¡Ri juluwem la u nojisam ronojel ri uwächulew!

⁶ Ri e nu c'ulel xquicoj jun c'amibal chnuwäch rech cuban quieb nu c'u'x; xquic'ot jun jul pa ri nu be, e are' c'ut xetzak chupam.

⁷ Ri wanima' c'o u rayinic, nu Dios, ri wanima' c'o u rayinic che qui bixoxic tak bix che la.

⁸ Chatc'astajok, nu c'aslibal; chatc'astajok, arp xukuje' nimalaj arp; ¡quinc'astaj na che ri c'ac' k'ij!

⁹ Quinya' na k'ij la cuc' tak bix, Ajawaxel, pa nimak tak tinimit xukuje' chquixo'l tak ri winak.

¹⁰ Ri lok'ok'ebal c'u'x la sibalaj nim copan c'ä chicaj; ri jicomal la curika' ri räxalaj caj.

¹¹ Nu Dios, lal c'o puwi' ri caj. ¡Ri juluwem la cunojisaj ronojel ri uwächulew!