Salmib 56 - Quiché Bible

Quincu'ba' nu c'u'x chrij ri Dios, quinya' c'ut u k'ij ri u tzij

¹ Nu Dios, chel c'u'x la chwe, e c'o winak ri e walijinak chwij; amak'el cäquimulij quib chwij, cäquiban c'ax chwe.

² Ri e nu c'ulel amak'el cäquitzucuj u banic c'ax chwe; e q'ui ri cäquimulij quib chwij ruc' nimarisan ib.

³ Aretak quinxe'j wib, quincu'ba' nu c'u'x chij la.

⁴ Quincu'ba' nu c'u'x chrij ri Dios, quinya' u k'ij ri u tzij; quincu'ba' nu c'u'x chrij ri Dios, man quinxe'j ta c'u wib. ¿Jas ta ri cäcuin ri winak cuban chwe?

⁵ Amak'el c'ax quech'aw chwe; xuwi cäquichomaj u banic c'ax chwe.

⁶ Cäquic'u' la' tak quib jeri' xukuje' jela' cäquiterenej ri e u xo'l tak wakan xak queyem jampa' quecuin che nu cämisaxic.

⁷ ¿La ma ta c'u lo caquikajbej na ri quetzelal? Nu Dios, chemach'irisaj la ri tinimit ruc' ri oyowal la.

⁸ Lal ajilam la ri wanimajic; lal quemol la ri e u wa'l tak nu wäch chquijujunal. ¿La ma ta e tz'ibam la chupam ri wuj la?

⁹ Ri e nu c'ulel quebanimaj na aretak quintz'onoj ri to'banic la. In kas weta'm chi ri Dios c'o che nu to'ic.

¹⁰ Quincu'ba' nu c'u'x chrij ri Dios, quinya' c'u u k'ij ri u tzij; quincu'ba' nu c'u'x chrij ri Ajawaxel, quinya' c'u u k'ij ri u tzij;

¹¹ quincu'ba' nu c'u'x chrij ri Dios, man quinxe'j ta c'u wib. ¿Jas ta ri cäcuin ri winak cuban ta chwe?

¹² Ri chi'nic ri xebenchi'j che la nu Dios, quebentz'akatisaj cuc' tak bix.

¹³ Rumal rech chi xinesaj la pa u k'ab ri cämical, rumal rech chi xinto'tajisaj la rech man quintzak ta, rech quinbin pa ri u sakil ri c'aslemal, chuwäch ri Dios.