Salmib 55 - Quiché Bible

U ch'awem ruc' Dios ri terenem pa rakan

¹ Nu Dios, chta' la ri nu ch'awem; xak mäya' la can chi jeri' ri tok'ob ri quintz'onoj che la.

^2-3 Choc la il chwe, chinch'abej la ulok; pa ri nu c'axc'olil quintz'onoj tok'ob che la. Quinbirbit rumal ri qui ch'abal ri c'ulel, ri qui rakoj tak chi'aj ri e banal tak etzelal. Qui mulin c'axc'ol chwij, cäquiban c'ax chwe ruc' ch'ujilal.

⁴ Ri wanima', cäk'oxow cho nu c'u'x; ri xibriquil re ri cämical kajinak panuwi'.

⁵ Nu rikom nimalaj xibriquil; ¡quinbirbit rumal xe'n ib!

⁶ Quinbij c'ut: “C'o ta banom wi e c'o ta nu xic' jacha' ri palomax; quinrapap ta ri', cuya' c'u ri' quinuxlanic.

⁷ Quinrapap ta ri' quinbe naj; quinejekel ta ri' pa ri chaki'j uwo sak.

⁸ Quinxiq'uin ta ri' quinbe ruc' aninakil che u ch'ukic wib rech man cuban ta c'ax ri quiakik' chwe xukuje' ri cakulja.”

⁹ Sacha' la qui wäch Ajawaxel, yuju' la ri qui ch'abal, man c'o ta chi jas quinwilo xuwi ri banoj c'ax xukuje' ri oyowal,

¹⁰ chi pa k'ij chi chak'ab caquibinibej ri tinimit. Etzelal xukuje' ch'ayanic queban pa ri tinimit: chuwirinak chi ri tinimit;

¹¹ nojinak ri u xo'l tak ja che tokinic xukuje' subunic.

¹² Man jun c'ulel ta ri banowinak ta c'ax chwe, quincuin ta c'u ri' quincuy u mac; mawi jun ri cäretzelaj ta nu wäch ri xuyac ta rib chwij, quincuin ta c'u ri' quinc'u' wib chuwäch.

¹³ ¡Lal, ri lal banowinak c'ax chwe, ri kachil kib uc' la,

¹⁴ ri junam cakarik kib uc' la pa ri rachoch ri Dios rech cujtzijon ruc' ronojel kanima', ri xenwachilaj xujbin chquixo'l ri winak!

¹⁵ ¡Chemajix ri e nu c'ulel rumal ri cämical! ¡E c'asc'oj chekaj pa ri mukubal, nojinak c'u ri canima' che ri etzelal!

¹⁶ Ri in c'ut quinsiq'uij na ri Dios; ri Ajawaxel quinuto' na.

¹⁷ Quintzujun na chuwäch, quinok' na ak'ab, benak k'ij xukuje' chak'ab, cutatabej c'u na ri nu ch'abal.

¹⁸ Quinuto' na pa tak ri ch'o'j; cuchajij ri nu c'aslemal, pune' sibalaj e q'ui ri quewalij chwij.

¹⁹ Ri Dios ri cajawin chbe k'ij sak, cutatabej na ri nu ch'awem quebukasaj c'u na ri e nu c'ulel; man cäquiq'uex ta c'u ri qui no'j mawi cäquixe'j ta quib chuwäch ri Dios.

²⁰ Caquiwalijisaj ri qui k'ab chquij ri cachil; man caquitz'akatisaj ta ri qui chi'nic chi canima' quib cuc'.

²¹ C'o na ri u lebebic ri qui tzij chuwäch ri mantequiy, ch'o'j c'ut ri cacaj. Ri qui ch'uch'ujil ri qui tzij c'o na chuwäch ri aseit, man je ta c'ut xa c'u e ch'ich' re ch'o'j.

²² Chaya' can ronojel ri a bis pa u k'ab ri Ajawaxel, catutok'ej c'u na; mawi c'u jumul cuya' be chi cätzak ri winak ri cäniman che.

²³ Nu Dios, ri cämisanelab xukuje' ri banal tak tzij man naj ta quec'asi'c mawi cäniq'uiajir ri qui c'aslemal; lal caban na la chque chi quetzak bic chupam ri mukubal, ri in c'ut nu cuban nu c'u'x chij la.