Salmib 51 - Quiché Bible

Nu Dios, chel c'u'x la chwe

¹ Rumal ri lok'ok'ebal c'u'x la chwe, nu Dios, chel c'u'x la chwe; rumal ri nimalaj u ch'uch'ujil ri anima' la, che saj la ri nu mac.

² ¡Chinch'ajch'obisaj la chesaj la ri wetzelal! ¡Chinjosk'ij la chesaj la ri nu mac!

³ Quinch'ob wib chi man in nimaninak taj; ri nu mac mawi jubik' quel pa nu jolom.

⁴ Chwäch la in macuninak wi, chwäch la xuwi in macuninak wi, xinban c'ut ri lawaloyil ri cäc'okoj la. Rumal ri' suc' ri chomanic la; man cäc'ulelax ta ri k'atan tzij la.

⁵ Kastzij, in lawalo kas aretak xinalaxic; in ajmac wi ulok kas pa ri u c'u'x ri nu nan.

⁶ Kastzij, ri lal calok'ok'ej la ri anima' ri jicom, cäc'ut la ri no'j chnuwäch chupam ri wanima'.

⁷ Chinjosk'ij la ruc' k'ayes re hisop, quinjosk'itaj c'u na; chinch'aja' la, sak c'u quincanaj na chuwäch ri sakalaj tew.

⁸ Chinnojisaj la che utzil xukuje' quicotemal; chinquicotisaj chi c'u na la jumul, pune' in c'axc'obisam la.

⁹ Chänajtajisaj la ri nu mac chwäch la xukuje' chesaj la ronojel ri wetzelal.

¹⁰ Nu Dios, ¡cojo' la jun ch'ajch'ojalaj wanima'!, ¡ya' la jun c'ac' uxlabal chwe ri jic!

¹¹ Mintas la chwäch la, mawi maesaj la ri tastalicalaj uxlabal la chwe.

¹² Bana' la chwe chi quinna' chi jumul ri quicotemal ri cuya' ri colonic la; chinuc'aj la ruc' ri uxlabal la ri telechinel,

¹³ rech quebenc'ut ri be la chquiwäch ri man ch'abexic ta cäcaj, quetzelej c'u ri ajmaquib uc' la.

¹⁴ Mintzokopij la che qui banic cämisanic, nu Dios, Dios re ri nu colotajic, quinwesaj c'u na tzijol la cuc' tak bix chi lal suc'.

¹⁵ Ajawaxel, jaka' la ri nu chi', ruc' c'u ri nu chi' quinya' na k'ij la.

¹⁶ Ri lal man quebaj ta la tak sipanic mawi tabal tak tok'ob ri quechajirisaxic; in quebenya' ta ri' che la, man e are ta c'u wa' ri quekaj ta chwäch la.

¹⁷ Ri e sipanic che ri Dios e are jun uxlabal ri c'axc'obinak; ¡ri lal man caxutuj ta la jun anima'aj ri c'äjim!

¹⁸ Chbana' la utz che ri Sion, ruc' ri rayibal la; cheyaca' chi la jumul ri e nimak tak u tapia ri Jerusalen.

¹⁹ C'äte' ri' quec'amowaj la ri tabal tak tok'ob ri quetok'ixic, awaj xukuje' sipanic ri quechajirisaxic; quechi'x c'u na alaj tak ama'ib tak wacax puwi' ri porobal ri ech la.