Salmib 50 - Quiché Bible

Ri Dios are' jun suc'alaj k'atal tzij

¹ Ri Ajawaxel, ri qui Dios ri c'o quekle'n, ch'awinak; e u siq'uim conojel ri winak ri e c'o cho ri uwächulew, ri e c'o pa elebal k'ij, ri e c'o pa ri u kajebal k'ij.

² Ri Dios cächuplin ulok pa ri Sion, ri tinimit ri sibalaj tz'akat ri u je'lal.

³ Ri ka Dios cäpetic, man xak ta c'u chi jeri': nabejinak jun k'ak' chuwäch ri cäsachan wächaj; terenetal rumal jun xibibalalaj cakulja.

⁴ Kas chicaj ri Dios, cusiq'uij ri caj xukuje' ri ulew che rilic ri k'atan tzij puwi' ri u tinimit:

⁵ “Chebimulij ri e jic wuc', ri qui banom jun c'ulwächinic wuc' che u chi'xic jun tabal tok'ob chwe.”

⁶ Ri caj cuk'alajisaj chi ri Dios are' jun suc'alaj k'atal tzij.

⁷ “¡Chatampe', nu tinimit, Israel; quebenya' ri jastak chisak chawäch! ¡In Dios, ri a Dios!

⁸ Man c'o ta quinbij chawe chque tak ri e tabal tak tok'ob, xukuje' ri e tabal tak tok'ob ri quechajirisaxic, ri amak'el quebachi'j chwe.

⁹ Man quebenta' ta alaj ama'ib tak wacax chawe ri e c'o chquixo'l ri a wacax mawi ama'ib tak q'uisic ri e c'o chquixo'l tak ri a q'uisic',

¹⁰ e wech c'u in conojel ri juyubal tak awaj; xukuje' tak ri awaj ri e c'o pa tak ri juyub;

¹¹ e wech ri chicop ri c'o qui xic' ri e c'o pa tak c'ache'laj xukuje' conojel ri quechirnaj pa tak ri juyub.

¹² We ta quinnumic, man quinbij ta na ri' chawe, wech c'ut ri uwächulew, xukuje' ronojel ri c'o chuwäch.

¹³ ¿La quiti'jal ta puch ama'ib tak wäcax quintzukbej ta wi wib, o quinwuq'uiaj ta qui quiq'uel ama'ib tak q'uisic'?

¹⁴ ¡Ri a sipanic chux maltioxibal che ri Dios; chebatz'akatisaj che ri Dios aj chicaj ri e a chi'nic!

¹⁵ Chinasiq'uij aretak at c'o chupam ri c'axc'olil; in catinwesaj na chupam ri c'axc'olil, ri at c'ut caya' na nu k'ij.

¹⁶ Che c'u ri banal etzelal ri Dios cubij che: ¿Jas ta ri awe at che chi quebanataj tak ri e nu pixab o canataj ri nu c'ulwächinic?

¹⁷ We man cäkaj chawäch chi catinjic'o mawi nim quebawil wi tak ri e nu tzij.

¹⁸ Ri eläk'om cac'ulaj ruc' ronojel awanima'; ¡cajunamaj awib cuc' tak winak ri quekaj pa mac cuc' niq'uiaj winak chic!

¹⁹ Che ri lawaloyil xukuje' che qui banic tak tzij quetzokopitaj ri awak' xukuje' ri e a chi'.

²⁰ Cayac jalum k'abam chrij ri awachalal; ¡c'ax catch'aw che ri awachalal!

²¹ Ronojel wa' a banom, man c'o ta c'u jas nu bim chawe; xachomaj chi in junamatal awuc'. Quinq'uiak c'u na ri a mac chapalaj, ¡quinya' na ri tojbal awe jas ri takalic!

²² Kas chich'obo' wa', ix ri sachinak ri Dios pa i jolom, minchaplej ne i muchic ri ma ta c'u c'o jachin quixesan pa nu k'ab:

²³ Ri cuchi'j ri u maltioxinic chwe, cunimarisaj nu k'ij. ¡In quinto'tajisaj ri cäjeki' pa ri nu be!”