Salmib 5 - Quiché Bible

Cachaplex ri k'ij ruc' ri Dios

^1-2 Ajawaxel, wajawinel xukuje' nu Dios, chetatabej tak la ri e nu tzij choc la il chque tak ri e nu ch'ikowem, chetatabej la ri e nu bochi'nic, che c'u la quinpakba' wi ri nu ch'awem.

³ Ak'abibal tatabej la ri nu ch'abal; sibalaj ak'abibal quinya' ri nu rajawaxic chwäch la, quinweyej c'ut ri catzelej la u bixic chwe.

⁴ Ri lal man lal ta jun Dios ri caquicot ta la chupam ri lawaloyil; ri banal tak etzelal man quecuin ta quejeki' ta chixucut la,

⁵ mawi c'o ta c'olbal chwäch la chque ri e banal tak nimal. Lal quetzelaj la qui wäch ri banal tak etzelal,

⁶ cäsachisaj la qui wäch ri banal tak tzij, man quec'ulaj ta la ri subunelab ta winak xukuje' ri cämisanelab.

⁷ Are c'u ri in rumal ri nimalaj lok'ok'ebal c'u'x la, quincuinic quinoc chupam ri achoch la; quincuinic quink'ijilan che la ruc' nim ilic la quinca'y c'u apan che ri tastalicalaj achoch la.

⁸ Ajawaxel, qui mac quech ri qui banom qui c'ulel chwe c'ama' la nu be chupam ri suq'uilal, chinc'ama' la bic chupam ri utzalaj be.

⁹ Ri e are' mawi jumul jicom ta ri quech'awic; ¡e chuwirinak chquipam! Ri u pa qui kul junam ruc' jun mukbal ri jaktalic; ¡ri cak' banal tzij!

¹⁰ ¡C'äjisaj la qui wäch nu Dios! ¡Chbana' la chi man utz ta quel ri itzel tak qui chomanic! Chexutuj la rumal ri q'uialaj tak qui mac, rumal rech chi quiwalijisam quib chij la.

¹¹ Chequicot ri cäquitzucuj ri u ch'ukic quib uc' la; amak'el chebixon rumal quicotemal rumal rech chi lal quechajin la. Ri quelok'ok'en che la quequicot rumal ech la,

¹² are c'u ri lal Ajawaxel, catewichi'j la ri jic; ri utzil la casutij rij jacha' jun quetequic ch'ich'.