Salmib 49 - Quiché Bible

Ri puak man are ta ronojel

¹ Kas utz u tatabexic wa' chibana', tinimit tak xukuje' ri e jekel cho ronojel ri uwächulew;

² chi k'inomab chi mebayib, chi nimak qui k'ij chi man nimak ta qui k'ij.

³ Ruc' no'j quintzijonic quebenk'alajisaj na chomanic ri e mukutalic;

⁴ quinya' na nu xiquin che qui tatabexic ri c'ambal tak u pa chi'aj, quinya' na u bixic ri nu c'u'm ruc' rok'ebal arp.

⁵ ¿Jas ta che quinxe'j wib aretak quepe ri lawalolaj tak k'ij; aretak sutim wij rumal ri quetzelal ri e nu c'ulel?

⁶ We winak ri' qui cu'ban qui c'u'x chrij ri qui k'inomal, cäquiban nimal chi q'ui jastak que c'olic;

⁷ man c'o ta c'u jun cäcuinic cuto'tajisaj ta rib pa re wi mawi cäcuinic cutoj ri Dios rech cäto'taj ta ri u c'aslemal rumal.

⁸ ¡Man c'o ta jun puak ri cäcuin ta che u lok'ic ri u c'aslemal ri winak,

⁹ rech cäc'asi ta chbe k'ij sak ma ta c'u chkajbex rumal ri cämical!

¹⁰ C'o chkawäch chi xak junam ri qui camic conojel, xak quejunamataj ri ajno'jab cuc' ri conab, quecanaj c'u can ri qui k'inomal chque jule' chic.

¹¹ Pune' xquicoj ri qui bi' chquij tak ri culew, ri mukubal are junalic qui c'olbal; ¡chila' quecanaj wi can chbe k'ij sak!

¹² Ri winak man junalic ta cac'asi'c pune' ta sibalaj k'inom; xak junam ri u cämic cuc' tak ri awaj.

¹³ Je u sachic qui wäch wa' ri cäquicu'ba' qui c'u'x chquij chquibil tak quib; jewa' u sachic qui wäch ri caquiya' qui k'ij chquibil tak quib:

¹⁴ Chque we winak ri', ri cämical are ajyuk' ri quec'amow bic pa ri mukubal e je ta ne chij. Aretak cäpe ri ak'abibal, ri e utz quech'äcan na paquiwi'; ri qui chuk'ab cäbe na u q'uisic are c'u ri mukubal are qui jekelibal.

¹⁵ Ri Dios c'ut quinresaj na pa u k'ab ri cämical, quinuc'am na bic ruc'.

¹⁶ C'ax mana' aretak c'o jachin cäk'inomaric cäq'uiyir c'u ri jastak rech pa ri rachoch,

¹⁷ aretak cäcämic man cäcuin taj c'o ta jas cuc'am bic, man cäteri ta bic ri u k'inomal chrij pa ri mukubal.

¹⁸ Pune' nim ri u quicotemal aretak c'asalic, cäya' c'u u k'ij cumal ri winak rumal ri u k'inomal,

¹⁹ copan na ri k'ij aretak cäcämic, man cäril ta chi c'u ri chäj.

²⁰ Ri winak man cach'obon taj, pune' sibalaj k'inom; chi xak junam ri u cämic cuc' tak ri awaj.