Salmib 48 - Quiché Bible

Ri nimalaj u banic ri Sion, u tinimit ri Dios

¹ ¡Nim ri Ajawaxel! ¡Ri ka Dios takal u ya'ic u k'ij pa ri u tinimit, pa ri tastalicalaj u juyub!

² ¡Sibalaj je'l ri u chicajil ri juyub Sion, jela' pa u xcut ri riquiak'ab ri elebal k'ij! ¡Are u quicotemal ronojel ri uwächulew! ¡Are u tinimit ri ajawinel ri nim u k'ij!

³ Ri Dios c'o chquipam cachoch tak ajawinelab pa Jerusalen; ri Dios u k'alajisam rib chi are' panibal ri co jekelic.

⁴ Ri ajawinelab xquimulij quib junam xebe chrij che u ch'äquic;

⁵ aretak c'ut xquil ri tinimit xpe canima', man cäquirik ta chic jas cäquibano, xebanimajic.

⁶ Xechaptaj rumal ri xibriquil: xquibak'atila' quib rumal k'oxom, jacha' jun yawab ixok;

⁷ jacha' ri quiakik' re elebal k'ij ri quebuc'äjij tak ri jucub re Tarsis.

⁸ Chupam ri u tinimit ri ka Dios, ri c'o ronojel u cuinem, kilom ruc' ri ka bak'wäch junam ruc' ri tzijom chke: ¡Ri Dios cujekeba' na ri tinimit Jerusalen chbe k'ij sak!

⁹ Nu Dios, pa u niq'uiajil ri achoch la cujchoman chrij ri nimalaj lok'ok'ebal c'u'x la.

¹⁰ Nu Dios, cäya' k'ij la cho ronojel ri uwächulew jas ri takal che ri bi' la. Ruc' ri cuinem la caban la tz'akatalaj suq'uilal.

¹¹ ¡Chquicot ri juyub Sion! ¡Chech'opintaj che quicotemal tak ri tinimit aj Juda cumal ri suc'alaj tak chomanic la!

¹² Chisutij rij ri Sion chebiwajilaj c'u ri e tac'atic tak ja ri e c'o chupam;

¹³ kas chiwila' ri u tapia xukuje' tak ri cachoch tak ri ajawinelab, rech quixcuinic quebitzijoj chque ri e i winakil ri quepe na

¹⁴ chi jewa' ri ka Dios, pa ronojel ri chbe k'ij sak. ¡Are c'u junalic c'amal ka be!