Salmib 47 - Quiché Bible

Ri Dios are' Ajawinel re ronojel ri uwächulew

¹ ¡Chipak'pa' u pa i k'ab tinimit tak iwonojel! ¡Chiya' u k'ij ri Dios ruc' rakoj tak chi'aj re quicotemal!

² Rumal rech chi ri Ajawaxel, ri c'o chicaj, xibibal; are' ajawinel puwi' ronojel ri uwächulew.

³ Xebutuquij tak tinimit xukuje' nimak tak tinimit xebucoj chuxe' ri ka takanic.

⁴ U cha'om ri kechbal, ri nimarisabal u k'ij ri Jacob, ri xulok'ok'ej.

⁵ ¡Ri Dios ri Ajawaxel pakalinak pa ri u tem re ajawibal chquixo'l rakoj tak chi'aj re quicotemal xukuje' cok'ebal tak trompet!

⁶ ¡Chixbixonok, chebibixoj bix che ri ka Dios! ¡Chixbixonok, chebibixoj tak bix che ri Kajawinel!

⁷ ¡Chibixoj jun bix che ri Dios, rumal rech chi are' ajawinel puwi' ronojel ri uwächulew!

⁸ ¡Ri Dios are ri cajawinel ri nimak tak tinimit! ¡Ri Dios t'uyul puwi' ri tastalicalaj u tem re ajawibal!

⁹ Ri achijab ri nimak qui k'ij pa nimak tak tinimit, caquijunamaj quib ruc' ri u tinimit ri u Dios ri Abraham,

¹⁰ e rech c'u ri Dios ri cuinem ri e c'o chuwäch ri uwächulew. ¡Ri are' c'o puwi' ronojel!