Salmib 46 - Quiché Bible

Ri Ajawaxel c'o kuc'

¹ Ri Dios are' ka panibal xukuje' ka chuk'ab; to'l kech pa tak ri jok'otaj re c'axc'olil.

² Rumal ri' man cäkaxe'j ta kib, pune' capuc'pub ri uwächulew, pune' quebik'taj bic ri juyub pa ri u choil ri plo,

³ pune' cäjinin ri plo, naj cäpaki' ri u wäch chicaj, pune' quebirbob ri juyub rumal ri u c'anal.

⁴ Jun nima' cuc' tak ri u k'ab cuya' quicotemal che ri u tinimit ri Dios, ri sibalaj tastal na chquixo'l ri e u tinimit ri aj chicaj.

⁵ Ri Dios c'o pa u niq'uiajil wa', carilij c'u na; ri Dios cäto'w na che u chaplexic ri k'ij.

⁶ Ri nimak tak tinimit quebel ch'u'j, ri ajawibal quebirbobic, ri uwächulew capuc'pubic aretak cuya' chi cätataj ri u ch'abal.

⁷ ¡Ri Ajawaxel ri c'o ronojel u cuinem are' c'o kuc'! ¡Ri u Dios ri Jacob are' ka panibal!

⁸ Tisaj che rilic ri nimak tak mayibal ri e u banom ri Ajawaxel cho ri uwächulew:

⁹ U q'uisom qui tza'm ri ch'o'j c'ä pa ri q'uisbal u jutz' ri uwächulew; e u k'ajisam tak ri q'uiakbal ch'ab, e u muchum tak ri tz'imaj ch'ich', ¡e u porom tak ri carwaj re ch'o'j!

¹⁰ “¡Mich'ujarisaj iwib! ¡Chich'obo' chi ri in in Dios! ¡In c'o paquiwi' ri nimak tak tinimit! ¡In c'o puwi' ronojel ri uwächulew!”

¹¹ ¡Ri Ajawaxel ri c'o ronojel u cuinem, are' c'o kuc'! ¡Ri u Dios ri Jacob are to'l kech!