Salmib 45 - Quiché Bible

Bix che ri u c'ulanem ri ajawinel

¹ Je'licalaj tak tzij quewulul chupam ri nu chomanic; ri wak' xak junam ruc' ri u tz'ibabal jun utzalaj tz'ibanel. ¡Quinbixoj na ri nu bix chuwäch ri Ajawinel!

² ¡Lal ri sibalaj lal je'l na chquixo'l ri achijab! ¡Chi chi' la quetixtob wi ulok tak ri cochinic! Rumal ri' kas xa jumul lal tewichital rumal ri Dios.

³ Xima' la ri ch'ich' re ch'o'j xe' pam la, ri c'o chuk'ab uc' la. ¡Are wa' ri je'lalaj wikbal ib la!

⁴ Quiejeninak ruc' nimalil che ch'äcanem che u to'ic u wi' ri kastzij, ri mach'ibalil, ri colomal. ¡Ri iquiak'ab la cuban nimak tak mayibal!

⁵ Ri tinimit tak cäquimej quib chwäch la ajawinel; ri t'ist'ak tak ch'ab la, quech'iqui' na puwi' tak canima' ri e c'ulel la.

⁶ Ri ajawibal la, nu Dios, re chbe k'ij sak, ri k'atoj tzij la are jun suc'alaj k'atoj tzij.

⁷ Cälok'ok'ej la ri utzil, quetzelaj la u wäch ri etzelal. Rumal ri' lal cha'om rumal ri Dios; ri Dios la, lal u nojisam ruc' quicotemal chquiwäch conojel ri achil la.

⁸ Ronojel ri atz'iak la u c'oc'al mir, ruxlab k'ol aloe xukuje' cane'l; cuc' rok'ibal tak arp cäquicotisax la cumal chquipam nimak tak ja re marpil quech elepant.

⁹ Chquixo'l ri ixokib ri quexojowic e c'o qui mia'l tak ajawinelab; pa ri riquiak'ab ri tem la re ajawibal t'uyul wi ri ajawinel ixok, wiktal ruc' ri k'an puak ri sibalaj coc'.

¹⁰ Chattatabenok, alaj nu mia'l; chacojo retal ri quinya' u bixic chawe: Menataj chi chawe ri awachalaxic xukuje' ri a winakil,

¹¹ cäbe c'u ranima' ri ajawinel ruc' ri a je'lal; are' awajaw rajawaxic catniman che.

¹² U mia'l ajawinel re Tir, ri sibalaj e k'inomab na chquixo'l ri winak, cuc' tak sipanic, cäcaj chi quekaj chawäch.

¹³ Waral coc wi ri u mia'l ajawinel ruc' ronojel ri u je'lical. ¡Ri ratz'iak tz'otom ruc' k'an puak!

¹⁴ Wiktal pa ri ratz'iak cäc'am bic chuwäch ri ajawinel, terenetal cumal ri alitomab ri nimak qui k'ij, ri e rachil ri querachilaj pa ri nimak'ij.

¹⁵ Ruc' quicotemal quebinic, ruc' quicotemal queboc chupam ri rachoch ri ajawinel.

¹⁶ Ri e c'ojol la, ajawinel, quet'uyi' na puwi' ri qui tem re ajawibal ri e mam la, caban c'u na la chi que ajawin pa ronojel ri ulew.

¹⁷ Quinban na chi cänatax ri bi' la cumal ri c'äte queq'uiy chic, chyo'k ta k'ij la cumal tak ri tinimit amak'el, chbe k'ij sak.