Salmib 44 - Quiché Bible

Ch'awem che u tz'onoxic ri u to'banic ri Dios

¹ Nu Dios, e ka tom cuc' tak ri ka xiquin, e quitzijom tak ri e ka mam chke ri xban la pa tak ri qui k'ijol, pa tak ri ojer tak k'ijol ri e oc'owinak:

² Ruc' ri k'ab la xebesaj la bic ri e k'ijilal tak diosib, xc'äjisaj la qui wäch ri nimak tak tinimit, xejekeba' c'u la ri e ka mam chila'.

³ Man are' ta c'u ri qui chuk'ab mawi ri qui ch'ich' re ch'o'j ri xyo'w ta ri ch'äcanic chque; man e are' ta xech'äcow ri ulew. ¡Are ri cuinem la xukuje' ri chuk'ab la! ¡Are' ri u juluwem ri wächbal la, rumal chi e lok' chwäch la!

⁴ ¡Wajawinel! ¡Nu Dios! Lal xyo'w la ri ch'äcanic che ri tinimit la;

⁵ ruc' ri to'banic la xekach'äc ri e ka c'ulel; ¡pa ri bi' la xekaxak'alej ri cäquiban c'ax chke!

⁶ Man xincu'ba' ta c'u nu c'u'x ri' chrij ri nu ch'ab mawi ri nu ch'ich' re ch'o'j cacuin ta ri' cuya' ta ri ch'äcanic chwe;

⁷ lal ri' ri xbanow la chi xekach'äc ri ka c'ulel, ri xukuje' xebeya' la pa q'uixbal ri xquetzelaj ka wäch.

⁸ ¡Amak'el cäkanimarisaj na kib chij la nu Dios, amak'el cäkaya' na u k'ij ri bi' la!

⁹ Uj xutum c'u la; esam la ka q'uixbal. Man cäbe ta chi c'u la cuc' ri kajch'ojab pa ri ch'o'j.

¹⁰ Banom la chke chi xa cujanimaj chquiwäch ri e ka c'ulel; ri cäquetzelaj ka wäch cujqueläk'aj, cäquic'am c'u bic jachique ri cäcaj.

¹¹ Uj jachom la, uj jacha' ta ne chij ri quebe pa ri pilibal; uj tuquin la chquixo'l ri quequik'ijilaj ri diosib;

¹² man pakal ta ri c'ayim wi la bic ri tinimit la, man c'o ta c'u ch'äcom la che u c'ayixic bic.

¹³ Uj yo'm la pa q'uixbal; ri e ka c'ulja cujquiyok'o cäquitze'j c'u ka wäch.

¹⁴ Banom la chi ri quequik'ijilaj ri diosib caquitze'j ka wäch; aretak cujquilo, caquisutisa' ri qui jolom che retz'bexic ka wäch.

¹⁵ Man c'o ta jok'otaj ri ma ta quina' wib chi in mach'italic; cäkaj ri nu palaj che q'uixbal.

¹⁶ U mac rech ri c'ulel, ri cutijtobej resaxic ri royowal chwij quinuyok'o xukuje' quinutzuru.

¹⁷ Wa' we xkac'ulmaj ri', man rumal ta rech chi xsach ta la pa ka jolom. ¡Ma ta mat ka tz'akatisam ri c'ulwächinic la!

¹⁸ Man ka chomam ta chi cäkaxutuj ta la canok mawi ka yo'm ta can ri be la.

¹⁹ Uj yo'm c'u ne la canok chquixo'l ri juyubal tak tzi'; ¡Uj ch'ukum la chupam jun xibibalalaj k'ekumalil!

²⁰ We ta xsach la pa ka jolom, ka Dios, xkak'ijilaj ta c'u jun dios chic che q'uexwäch la ri man keta'm ta u wäch,

²¹ xetamaj ta c'u la ri' conojel ri jastak ri sibalaj e c'u'talic.

²² U mac c'u ech la xak keye'm ri cämical; ronojel k'ij; je cäban chke jacha' ri caban chque ri chij ri pilic quij.

²³ Ajawaxel, ¿jasche cäwar la? ¡Chäc'astaj la, chäc'astaj la! ¡Kas xa jumul mujxutuj la canok!

²⁴ ¿Jasche cäc'u' ib la chkawäch? ¿Jasche cujsach pa jolom la, oc'owinak u wi' ri c'ax ri cätajin cakariko?

²⁵ Uj k'itajinak uj mach'italic, xak quekajuruj chic ri e ka cuerp cho ri ulew.

²⁶ Walijala, saj la che ka to'ic, chujcolo' la ruc' ri lok'ok'ebal c'u'x la.