Salmib 42 - Quiché Bible

Ri eyebal nu c'u'x c'o ruc' ri Dios

¹ Jacha' jun masat ri cächaki'j u chi' cutzucuj jun nima', je quinban che tzucuxic la, nu Dios.

² Cächaki'j nu chi' che ri Dios, ri Dios ri cuya' c'aslemal. ¿Jampa' lo ri quinetac'al chi chuwäch ri Dios?

³ Pa k'ij xukuje' chak'ab, ri e u wa'l nu wäch e are nu wa, amak'el c'ut cäc'ot nu chi', cäbix chwe: “¿Jawije' c'o wi ri a Dios?”

⁴ Aretak quinchomaj quij we jastak ri', xa cänimataj ri nu k'oxom; cänataj chwe aretak in benak junam cuc' ri winak nu c'amom qui be c'ä pa ri rachoch Dios, cäkarak ka chi' ruc' quicotemal xukuje' cuj maltioxinic. ¡Jun nimalaj nimak'ij c'u ri'!

⁵ ¿Jas ta che cuban quieb nu c'u'x? ¿Jas ta che quinoc il? Ri eyebal nu c'u'x nu yo'm chrij ri Dios, ri c'ä quintakej na u k'ijilaxic. ¡Are' ri nu Dios xukuje' nu colonel!

⁶ Quinna' chi sibalaj u banom quieb nu c'u'x. Rumal ri' quinchoman che la pa ri rulewal ri nima' Jordan, pa tak ri juyub Hermon xukuje' Mizar.

⁷ Quetataj chquipam ri najalaj tak siwan ri qui chojojem ri ja' ri qui pak'ak'em ri quebe tak la ulok e oc'owinak panuwi'.

⁸ Pa k'ij ri Ajawaxel cutak ulok ri lok'ok'ebal u c'u'x chwe, chak'ab man catani ta ri nu bix mawi ri nu ch'awem ruc' ri Dios ri ajchak'e ri nu c'aslemal.

⁹ Quinbij che ri Dios, ri to'l wech: “¿Jasche in sachinak pa jolom la? ¿Jasche nu takem bis nu rikom c'ax pa qui k'ab ri nu c'ulel?”

¹⁰ C'ä quek'oxow c'u ne na ri e nu bakil cumal ri c'axc'obisanic ri cäquiban ri e nu c'ulel chwe, ri amak'el cäquic'ot nu chi' cäquibij: “¿Jawije' c'o wi ri a Dios?”

¹¹ ¿Jas ta che cuban quieb nu c'u'x? ¿Jas ta che quinoc il? Ri weyebal nu c'u'x nu yo'm chrij ri Dios, ri c'ä quintakej na u k'ijlaxic. ¡Are ri nu Dios xukuje' nu colonel!